انا عندي ضغط وسكر !!

بسم الله الرحمن الرحيم
السلام عليكم ورحمة الله وبركاته

المرض ابتلاء من الله للعبد وتمحيص وتكفير من الذنوب .

- عن أبي هريرة وأبي سعيد الخدري رضي الله عنهما، عن النبي صلى الله عليه وسلم قال: { ما يصيب المسلم من نصب، ولا وصب، ولا هم، ولا حزن، ولا أذى، ولا غم، حتى الشوكة يشاكها إلا كفر الله بها من خطاياه }
2 - وعن أبي مسعود قال: قال رسول الله صلى الله عليه وسلم : { ما من مسلم يصيبه أذى من مرض فما سواه إلا حطّ الله به من سيئاته كما تحط الشجرة ورقها } [متفق عليه].

اذاَ من المسلم به فضل المرض للمريض اذا صبر واحتسب .

لكن المشكلة ان يصاب المريض بمرض فيتخذه وسيلة لاذاء الاخرين !

المناسبه :

كان لي معاملة في احدى الدوائر الحكومية واعطيت موعد الساعة السابعة والنصف صباحا .
الساعة السابعة والنصف وانا مسنتر امام المكتب ولا فيه رجال .
ثمانية الا ثلث اول واحد دخل قلت : انتظر قليل على الاقل يجلس على مكتبه ودخل الثاني .
( اعمارهم لاتقل عن الستين )
بعد قليل دخلت : السلام عليكم ,
( وبعد شهيق وزفير التفت احدهم اليّ بنصف عين ورد بصوت ظعيييييف ( مرحبا ) .)

قلت : عندي موعد لمعاملة عندكم .
اشر باصبعه على الثاني . ( يعني عنده )
رحت له وكلمته قال : ويديه على جبهته :
انتظر فلان .
جلست حتى الساعة الثامنه وربع ماجاء احد الا الاثنين فقط .
( رئيس القسم ومساعده .)

قلت : ما جاء الرجال وانا عندي شغل وابغى نتيجة المعامله وش صار عليها !!
قال : ياخوي المعاملة عند فلان ولا يحل لك الموضوع الاهو ! انتظر .!!

ثمانيه ونصف لم يحضر فلان .
قلت : اقول هذا شكله ماهو حاضر اليوم وشوفوا لي حل .

قال : انا عندي ضغط وسكر ولا انا فاضي لك ريحنا تبي تنتظر او توكل على الله .

قلت : واذا عندك ضغط وسكر انا عندي معامله وهي التي تهمني اما انت فالله يشفيك .
قام وخرج !
كلمت الثاني قال : عنده ... ما عندي شيء !!
قلت : ما يبغى لها ,, المدير !
رحت للمدير واذا به يناهز السبعين وواضح السكر والضغط في وجهه .
شرحت له قصتي قال :
وانا وش عليّ ؟ !!!!

كيف وش عليك ؟؟ انت المدير .

قال : رح لهم وهم اعرف .
عرفت ان الموضوع ماش .

رجعت واذا بالموظف وصل .
شاب في الثلاثينات تقريبا .
كلمته قال :
هذه معاملتك اخلصها ذا الحين .
وفعلا انهاها ببساطة وخرجت وانا افكر !!

اولا : هل المراجع مسئول عن مرض الموظف حتى يتعذب بسببه ؟
ثانيا : لماذا مثل هؤلاء الكبار في السن والذين تجاوزوا ( 55 سنة) لا يتم تقاعدهم وترك المجال لغيرهم من الشباب ؟

ثالثا : لماذا لايتم التعقيب على الموظفين للحضور في الوقت المحدد ؟

اسأل الله ان يشفي كل مريض وان يجعل ما اصابه طهورا له .

وان يعيننا على مراجعة الدوائر الحكومية والتي قتلها الروتين .

والسلام عليكم .