لو تصير مستشار لخادم الحرمين الشريفين !!

يا اخوان البارحه تحلمت وكأني مستشار لخادم الحرمين الشريفين الملك عبدالله بن عبدالعزيز اذكر انه قال وش رايك بأوضاع الدوله والمواطنين وماهي مرئياتك للمستقبل وماهي من وجهة نظرتك القرارات التي يجب ان تخرج لتستمر مسيرة الخير والعطاء في البلد بدون اي ضغط او تكاليف على الميزانيه؟

قلت له شف يابو متعب

اول شئ لازم تفك العمله السعوديه من الارتباط في الدولار.. وضربت له مثل في جيراننا الكويتيين وبصراحه اعجب فيها وقال يصير خير...انا قلت له اهم شئ لاتستشير وزير الماليه والتويجري راعي سوق المال...

ثاني شئ قلت له نبي وزير مواصلات جديد..اللي موجود هالحين مااستفاد منه الا الخطاطين اللي يكتبون امامك تحويله ...نبي وزير المواصلات الجديد فيه فوبيا الطيران علشان يضطر يسافر في البر ويشوف الطرق بنفسه ...

ثالث شئ قلت له ياخادم الحرمين حنا بلد يسكنه 20 مليون سعودي..بالله ماهو عيب علينا ماعندنا 11 لاعب يلعبون كوره زي الناس ويكون طموحهم المنافسه على كأس العالم قال والله انك صادق بس الرياضه ماهي من اهتمامات الشعب السعودي وش اسوي فيهم..لو يبون فريق بلوت والا كيرم معك حق تتشره..

رابع شئ قلت له ياطويل العمر شف لك حل مع مواطنينك اللي مايسددون البنك العقاري.. ماصارت في دول العالم هالحين يرضيك الشاب اللطيف حمود الثامن عشر ينتظر 15 سنه علشان يسكن بيته اللي من الدوله..خلهم يسددون

خامس شئ قلت له ياطويل العمر نبي مطار دولي بالنماص..قال هذي صعبه وقويه شوي وبيزعلون علينا اهل القصيم اكبر من النماص ولاسوينا لهم مطار دولي حاولت اقنعه بأن القصمان مايحبون السفر بس رفض الفكره وهددني بالتقاعد

سادس شئ اقترحت عليه اجبار محافظي المحافظات ومدراء الدوائر الحكوميه فيها على وضع ارقام هواتفهم الخاصه لتلقي ملاحظات واقتراحات وشكاوى المواطنين واللي ماعنده استعداد يزعجه الشعب يروح ينام عند امه

سابع شئ قلت له ياطويل العمر ليش مايكون لوزارة التجاره موقع الكتروني خاص بأسعار السلع في السعوديه بمافيها الخضروات والفواكه.. يعني مايكون عندنا تفاوت بالاسعار بين محل ومحل..قال صعب مراقبة الاسواق وتوعية المواطنين اصعب.. دور على اقتراح احسن.. لازال البحث جاري

ثامن شئ اقترحت عليه فتح التجنيد الاجباري للعاطلين عن العمل..خله يكرف سنتين ونصف مثل السوريين علشان يعرف النعمه اللي عايش فيها وبنفس الوقت نقضي على اشباه نانسي عجرم من هالشباب الجدد... زعل علي وقال بدل ماتشوف لنا طريقه نوظفهم جاي تقول تجنيد اجباري

تاسع شئ قلت له يابو متعب نبي تنزل ارامكوا السعوديه للاكتتاب العام..فشلونا شعبك.. يقولون بعضهم راحوا لعمان يحسبون اعصار غونو اكتتاب وغرقوا هناك المساكين


اخي المواطن السعودي من وجهة نظرك ماذا ينقص المملكه العربيه السعوديه وماهي اقتراحاتك المعقوله واكرر المعقوله لان الغير معقول لايصدر من انسان عاقل...

ودمتم أحبه