الصــــــــوره

يقول الذي يبني قصيده على أمتن ســاس= بنيت القصيد اللّي يغنيه جمهــــــــــوره
أقوله وأنا صادق ولي خاطر حســـــــاس= ونفسي على ما أقول في الحب مامـوره
وأنا يا محمد دَبّ في راسي الوســـــواس= من اللّي نظرته ملتوي داخل الصـــوره
نظرته وقلبي صار كنه وسط محمــــاس= وغرّد على غصن الشجركل عصفوره
وحسيت في جسمي حراره ولذعة مـاس= وصارت عيوني تذرف الدمع مجبــوره
وحسيت في راسي كما دقة الاجـــــراس=وصوت يراودني كما صوت مقطــوره
نسيت ان بحر الحب يبغى له الغـطـــاس=ويبغى له اللّي عارف جملة بحــــــــوره
وأنا يا أبو أحمد أخبرأني صليب الـراس= لكن الهوى يبعد صويبه عن شعــــــوره
صحيح البدن لكن في خاطري هوجـاس= وياخذ بي الهوجاس على الـمملكـه دوره
أقَسَمَ وأفَرَق وأتَخَير من الاجنــــــــــاس= ولكنها تطلع معي شبه مكســــــــــــــوره
ومن بعد هذا أقسمت ما أطاوعك يا الياس=ولا أطاوع اللّي دائم الدهر مغـــــــروره
وأغامر بروحي وأتعوذ من الخنــــّـاس= وألاعب نفوس في الهوى دوم مسـروره