القضيـــة !!

القضية تدور افْ-خاطري كل يوم
بين راسي _ جرايرها _ وبين اقلمي

والقصايد .. قصايد ما تسدّ اللزوم
لا تردّن يديني ما فزع لي فمي!!

مير هبّي على صدري .. والأمر مْحسوم
مع مهب الهبايب لا يضيع انسمي

ب-اتنومس ما دام إني قوي العزوم
ومرتكز في ميادين الطيب اعلمي

.
.
سلوتي .. لا تسمووبي إعيال القروم
يوم غيري يموت وما لِقي له سِمي!

وإن لحقني من أقصى الناس شرهه .. ولوم
قلت يا نفس شوفي لايمي.. واحكمي

كانه يْبيع مع خطو الرجال ويسوم
قمت اقايس اخطايه .. لا تزلّ اقدمي

وان لقيته من الناس .. الخساس .. الرخوم
لو قوامه قوي .. ما اسرّحه ف-اغنمي
.
.
وأنت ياللي تجيب العلم .. دوك العلوم
قلّه : إني عن اكل الميّتين امحمي

يوم له عام .. والسانه ما هوب امعصوم
عايش بين خلق الله على اكل إلحمي

ما درى إني عدوّ مضيّعين السلوم ؟؟
وإن راسي لساس اصل العرب منتمي ؟

ما اعْتلت هامتي فوق اكبر الروس .. زوم
معتليها بربعي / لابتي / محزمي

يوم ربي خلقنا .. حط للقوم قوم
ف-الرخا مبصرين وف-الشكاله عِمي

ويوم للقرم قَسْمه .. والضعيف امحروم
تارد اطروش ربعي.. ما تصدّر ضِمي

إيه .. حنّا على وجه المقفّي سموم
للخلا .. وإن طمع فينا .. المياسم حِمي

ما تساوت لنا الدنيا بحب الخشوم
نقصر اعمار ناس.. وما قصرنا الرمي

العدا نبتليها .. والرفيق امحشوم
والدخيل فْ-ذرانا وامن ومحتمي

لابتي .. ليّنين .. وفالمخاصم خْصوم
حقّهم ما يضيع .. وما غدا مقسمي

وإسهمي في المراجل من كبار السهوم
احمد اللي بفعله ما يطيح اسهمي

واختتم قالتي ما قلت ( حنّا البقوم )
من سمعني درى اني يالرجال ابقمي

..

أحترآآآمي (: