يا درة بين الصبايا فريدة

قلبي معك لو كنت بارض ٍ بعيدة=الحب ما تقتله طول المسافات
ما دمتي لقلبي على ما يريده=يالعنبوه اللي يخون البدايات
مجنونك امسى والغلا في وريده=واصبح وباقي له في الحب حاجات
يادرة ٍ بين الصبايا فريدة=في حسنها حازت جميع العلامات
فيك المزايا والصفات العديدة=مامثلها حتى بوصف الروايات
ياماضي الحب الكبير وجديده=يااللي عن الخافق تشيل الوجاعات
يااللي غيابك مثل نار ٍ وقيدة=يصلى بها الخافق وفي العين حسرات
يااللي لغيري كنتي اصعب عنيدة=واقبلتي لحبي بكيف وقناعات
واسكنتك بقلبي لحالك وحيدة=وقدرك رفعته واعتلى للسماوات
وعشنا السعادة والعلاقة وطيدة=علاقةٍ ما مثلها بالعلاقات!