من صد عن عيني سلا عنه بالي
إلا أنت إذا صديت ما عنك أسلا

كل الظروف إن رحت وإن جيت غالي
مع الزمان يزود حبك ويحلا

انت الحبيب اللي له القلب مالي
لا غيرك احد صار للعين يملا

مثل الذهب حبك بعمر الليالي
يزود ما يرخص على كل عمله

ان حل صوتك او خيالك طرالي
أنسى الهموم وضيقة الصدر تجلا

ان غبت طيفك ما يفارق خيالي
وان شفت زولك قلت اهلا وسهلا

هذا المثل ما هو دايم يقاللي
بعض العرب لـ غاب ياناس يغلا

حب الجنون اهواك يا راس مالي
يا عل منهو لامني فيك يبلا