اسعد الله اوقاتكم بكل خير اتشرف بطرح هذه القصيدة واتقبل التوجيه والنقد بكل صدر رحب
لغرض الاستفادة والافادة والارتقاء بمستوى القصيدة النبطية في مجتمعنا القروي

يا صاحبي لا تطفي النار بالنار=وتحدني ما بين ناري ونارك
ما اشد من حرّة غيابك والاسفار=الا لهايب جيّتك واحتقارك
البعد في وجهي تجاعيد وآثار=والصد خلا شيب راسي تبارك
اربع سنينٍ ليلها كنّه نهار=قضّيتها ما بين داري ودارك
سويت لي جرّه من الدار للدر=حتى كفوفي حتّمت في جدارك
وانا ادري ان الدار ما فيه من دار=الا صدى ذكراك وشكوك جارك
لكنّ ياخذني من الشوق تيّار=يشيلني ويحطني في مدارك
ازعل عليك ومنك واشك وآغار=يا زرعنا اللي ما حصدنا ثمارك
واليوم تنفضني عن امتونك اغبار=وتعزّ عن يمناي حتى يسارك
من وجهك البارد ومن هرجك الحار=اشعلت في صدري فتيل المعارك
بعد الهقاوي صارت اكباري صغار=واقصى طموحي في الحياة اعتذارك
ليته يجي لغيابك المرّ تكرار=واقضي حياتي كلها في انتظارك

وسلامتكم
خالد ال مشرف العمري