هذه القصيدة أرفعها إلى مقام أخي الغالي
سعادة اللواء / سعد بن عوض العمري
تهنئة و تبريكا له بمناسبة صدور الأمر
الملكي السامي الكريم بترقيته إلى رتبة لواء

بسم الله ابدا قبل بدعي والاقوال=تاجٍ وضعته فوق راس القصيدة
واحمدك يا ربي على كل الاحوال=حال المسرّة كان ولاّ الشديدة
تنسب لك الخيرات وانعام وافضال=من دين وامن و من حياةٍ رغيدة
ولا لغيرك تسجد اجباه واوصال=الكل يخضع لك بصدق العقيدة
من بعدها مني سلامٍ بمرسال=للكفو بو باسم وعلمي مفيدة
مبروك له تسري الفيافي و الاميال=واطلبْك يا ربي بخيرٍ تزيده
واطلبْك تجعلها على العون و الفال=في طاعتك عن دربها ما تحيده
يا خوك تشريفك لنا اشماغ و عقال=عالراس ملبوسه و كلٍ يريده
رتبة لواء تستاهلك وانت رجّال=غنيّ عنها في مقامٍ تشيده
والكل يشهد لك على بيض الافعال=صادق و مقدامٍ وجودٍ تفيده
واخذت من ثوب التواضع وباسبال=لبسٍ يجمّلْك وتجمّل جديده
و طموحك الي زلزل الصخر واجبال=في علم ولا في الدروب الرشيدة
اثبت نفسك في صعوبات واهوال=الين ما نلت الحياة المجيدة
تكلاك عا اللي ابقدرته كل الآجال=راع الفرج ما شي يمكن يكيده
هامتْك مرفوعة على كل الانذال=نظرتْك دايم في المواقف بعيده
وختامها المسك المعفّر ولا زال=في القلب باقي من هجوسٍ تقيده
وابياتنا لو هي قليلات فالبال=يضوي غلاً يصعب علينا نجيده
يقولها اللي ما بغى الجاه و المال=صافي وداده مرسلٍ من بريده