غوم الهواجيس

لا واهني اللي على طول سالي
ماهوب من غوم الهواجيس منصاب

ارجي عسى في يوم يرتاح بالي
وتشرق وتغرب كل يوم ولا طاب

طبيت في بحر الهوى لا ابالي
وكل الثقة زرعتها بكل الأصحاب

ولا كسبت الا الندامة لحالي
اخطيت يومن ثقت في بعض الأحباب

احد ثبت مره ومرات مالي
واحد من اول تجربة ماله اعصاب

واحد صدق واحد بحسب المجالي
واحد على طول الدهر دوم كذاب

لا واهني الطير بأرض المفالي
ايلاعب الغربي مع كل هباب

لا ضاق ريح فوق شم الطوالي
ماهوب مكبوت ورى سدة الباب

حلاله الفرحة وهمي حلالي
يسرح علي ويعودلي معه باحزاب