فجر
بداية دخولي المنتديات كان في منتدى مجاور وسألت نفس سؤالك عن بنت خطبها شخص قالوا انه ماهو اصل ولا كنت اعرف اش يعني ماهو اصل وسألت بالتحديد كيف يكون اللي ماهو اصل
وكيف يتحدد مكانه اذا كان مولود في نفس القبيله ويحمل اسمها وله عايله معروفه واهله مشهورين منهم اطباء ومهندسين وضباط وعايله ماعليها غبار لا خلق ولا دين
الغريب ان ما احد فادني بشي ولا قدرت اخرج بنتيجة انه هذا الرجل سيء لمجرد انه ماهو اصل
البنت من عايله معروفه في قبيلتها واصرت ( بجنون ) على هذا الولد اللي هو كمان انهبل علشان ياخذها
وما خلا واسطه ولا حيله ولا ترك في جهده جهد الين واجه ابوها وقال له شوفني انا وش فيني من عيب واحكم علي من خلاله
اما جد جدي فما ني مسؤول عنه ولا عن تصرفاته خاصة انه محد قال فيه اي عيب ديني او خلقي
الاب اقتنع وزوجها له
والان هم عايشين في سعاده وماشاء الله عندهم اطفال وماشي حالهم
اختها اخذت قريبها ولد اصل وعايله ومركز ووظيفه لكنه للاسف مايسوى البشت اللي لبسه في العرس وعاشت معه كم شهر ماودها تتذكرها وتركها عند باب البيت في ليله من الليالي ولا عاد سأل عنها ولاعن اللي كانت شايلته ولا اعتذر من ابوها ولاكلم اهلها كأنه ترك لهم بسه مو انسان ولا احترم اهلها ولا قدرهم بعكس الثاني اللي مايشوف عمه الا يقوم له ويحب راسه ويده ويشيله عن الارض شيل
حكاية الاصل ذي عادات بائده وكلام فاضي الرسول عليه الصلاة والسلام يقول مامعناه اذا جاءكم من ترضون دينه وخلقه فزوجوه الا تفعلوا تكن فتنة في الارض وفساد كبير
والرسول عليه الصلاة والسلام زوج بنت عمه وهي من اشراف قريش زوجها لزيد وهو خادم عنده ماقال اصل وفصل وصانع ومدري ايش
الان يجب ان يكون المقياس الرجل نفسه كيف هو ؟ هل هو رجل فعلا وينشد به الظهر وبتعطيه بنتها ويصونها ويكرمها ويحفظها ويكون عون لها على الايام ؟ والا هو شكل وعايله وسمعه وما يتوكل على شوية غنم
خلاصة الكلام
ان جانا الاصيل وتتوفر فيه صفات الرجوله والشهامه فخير على خير
وان جانا رجل وينقصه شيء مكمل ما ننشب ونخلي بناتنا يعنسون في انتظار الأصيل اللي ما ندري هو يجي والا يشوف له شي من خارج الحدود وحلال عليه لو كانت بنت يهود لكن البنت الله الله كم ينشبون لها في كل شي!!
فجر
الأخت هذي اللي استشارتك لو انا مكانك اقول لها طالما انها ترددت في قبوله معناها انها غير مقتنعه فيه فتقول له لا وتريح نفسها وتدعي لبنتها وان شاء الله يجيها اللي تتمناه
الشي الثاني
الزواج قسمه ونصيب فعلا وشئنا ام ابينا اللي مكتوب رح يحصل فالتوكل على الله والدعاء اهم من النظر الى اصله وفصله وجده السابع والا السادس عشر .
ان شا الله اكون افدتك بشي
ودمتي في خير .
|