( غرتك نفسك )


مالصوتى يالمشاريه حيل ولا عزوم
وان تعديتي عتب خاطري لا ترحلي

هوّدي عن ثورة الشك واقبال الهموم
لين يجنب تايه الفكر ولا يشملي

سامح الله جرح الاحباب يوم وكل يوم
جرح تبريه الليالي وجرح يعتلي

وانت ياللي كل ماامسيت جابتك الحلوم
مرني طيفك وفزيت يوم اقبل علي

ماغدت عنك المساري ولا بالنوم نوم
السهر عيت دروبه وعيّا ينجلي

اسالك بالله وامانه وغيره مايدوم
وش علامك يومك ارخصتنى ماقلت لي !

مانويتك نية الغدر وانكار السلوم
الغدر ماهو بسلمي ولا سلم اهلي

هد طيشك لايجي منك تجريحن ولوم
الله اللى عز قدري وثبّت منزلي

غرتك نفسك وغررت بالقلب الرحوم
لين حلت اقصى طموحي على باب اجهلي

وانت لو تمشى دروب الغلا مع كل قوم
ماحدن مقفي بقلبك ولاحدن مقبلي

والله انى قد وسمتك بكفّيني وسوم
ماتركت منك المياسم ولا ضلعن خلي

كم سنه مرت وانا اشرى بخفاقك واسوم
والطعون اللي بصدرك تغيض وتمتلي

قلت لي لا تجرحين الشعور ابلا لزوم
قلت لك : مايونس الجرح غير المبتلي

ايه احبك ايه احبك ولا فالحب لوم
والله ان لامااك شفــّي وصدك مقتلي

وان تباطيت الليالي وعديت النجوم
انت خابر وش رضايه وتدري بزعلي

رح وانا ياصاحبي منك لو عشت محروم
والله اني حبك اللي بقى والاوّلي