لا تحسبوني واعي بكل الاحوال=
تراني اغفي من عنى الهم وافيق

ساعات اقول اني على مستوى عال=
وساعات والله ما استطيع ابلع الريق

والصاحب اللي قال لي روق البال=
اقول له ضاقت ولا فيه ترويق

لو كنت تدري وش بصدري وما جال=
ما كان تسال ليه وش سبة الضيق

لا واهنيك يوم ع الحزن منحال=
ارقى شفا احزاني وترقى شفا ... فيق

وتعطي الخلايق من حلا الصوت موال=
وتجر بلحونك من احلى الطواريق

ماني بلك حاسد ولا ني بعذّال=
ويالله عسى في خطوتك كل توفيق

وانا لي الله ... من دعا الله قد نال=
فالطف بقلبي يوم للمهمهه سيق

مالي سواك وغيرك ان قال ما طال=
ومن حالتي يارب ما عاد انا اطيق

رحمتك يوم تقطعت كل الاسبال=
محمد شقاه الهم والهم به شيق

الحزن لا بسني من الجال للجال=
لايق على هيئتْه ولهيئتي ليق

أجامل الضحكة وع الفرح محتال=
والحزن سهمٍ عاجزٍ عنه آويق

شكلي آسى ويبين ما بين الاشكال=
من دون تحديقٍ ومن دون تدقيق

يالله في حظٍ قوي يبري الحال=
يوم الهنا والسعد حظ وتوافيق

فاقبلي الدعوات يالمرتجى العال=
ياللي بكفّك نا صيات المخاليق

بقلم / جبرني الوقت
( محمد آل مريع )