س1..عرفينا عن نفسك وخاصه في الطبخ ؟
بنت من بنات بني عمرو من عائلة معروفة في المطبخ بجودة الطبخ ، ماأحب أحد يسولف لي وأنا أشتغل
أحب أقتصر في المقادير بحيث أعوض أو أعملها في البيت إذا كانت مكلفة ، أحب التنويع ، لي أنا وأخواتي دفاتر تصور مابين الصديقات والأقارب نجمع فيه الأكلات الناجحه والمميزه .ما أحب إذا جانا أحد نجيب من برا إلا نادر حسب ماعودتنا أمي الله يحفظها
س2..وجبتك المفضله؟
بصراحه إذا رحنا الديره المشغوث ، غالباً البشمل
س3..طبق تحبين تسوينه كثير؟
والله كثيره بس عشان أهلي يحبونه ويحبون اسويها لهم بستمرار هي ورق العنب ، والجريش
س4..متى تعلمتي الطبخ؟
الطبخ الجدي والفعلي كان سادس وكان أول شيء سويته خبزه كانت أمي مسافره
س5..موقف طريف صار معاك في المطبخ ؟
لاتضحكون علي بصراحه أول مره يوم رحنا الديره كنت وقتها رابع إبتدائي وماكنت أدخل المطبخ لوجود أختي وأمي لكن أقوم بشغل البيت الباقي المهم كانت أول سنة نروح فيها الديره بعد أنقطاع وجانا حريم على الظهر تقريباً المهم كنت ابي أثبت لأمي أني أجيد الطبخ لأني كنت أبي أطبخ بأي وسيله قلت لها والله ماتقومين أنا بسوي القهوة المهم دخلت المطبخ ولا أعرف البن من الهيل أخذت فنجال قهوة وقست فيه كمية من الهيل وحطيت عليه مويه وخليتها تطبخ وكل ماتشوفين أمي أقولها شوي وأجيب القهوه وأختي كانت تلبس شافت أمي أني تأخرت يوم جات وشافتها عاد يشين المنظر أخذت علقة ساخنة وعرفت أني لازم أتعلم أول أو أسأل وعرفت الفرق بين البن والهيل
س6..يعتمد عليك في الطبخ او لا؟
ايه بدرجة كبيرة ارجع الظهر واطبخ وقبل أطلع الدوام العصر أرتب وأجهز القهوة والشاهي للزوار وارجع العشاء أسوي العشاء وهكذا وساعات أسوي حلى أو مالح أحتمال لو جاء أحد أو طلبوا مني أهلي صنف معين
س7..سوي طبخه وصوريها لنا؟إذا أمكن ليس إجباري!!!
المقلوبة
س8..نصحيه توجهينها لطباخات بني عمرو ؟
1- التسمية قبل البدء حتى تحصل البركة
2- تجنب الإسراف والتبذير
س 9..هل تستخدمي الميكرو يف؟
ماكان عندنا جانا هديه مع السكن الجديد مو كثير استخدمه
س 10..ما هو رأي أهلك و زوجك في طبخك ؟
بصراحه أهلي يحبون طبخي وخواتي أو قرايبي يشترطون قبل الزياره أسوي لهم أكلات معينة حتى في الرحلات احاول أسوي وأوزعها في علب بحيث مانحتاج من برا شيء
س 11..ماهي نوعية الاواني التي تفضلين ان تطبخي بها؟
عادي أي شيء طالما أنها أصليه ماهي تقليد بس يعجبني التيفال يخلي للأكل نكهة مااعرف ليش خصوصاً الإدمات العادية والهندية
س12..ماهي الأكلة التي تحبها عائلتك وأنتي لا تحبيها ؟
أي شيء دسم وغالباً كبسة اللحم أو أي شيء فيه لحم بقر أو جمل ماأحبها
س13.. اول طبخه طبختيها ؟؟
إضافة إلى الخبزة الكبسة والحلى كانت الكنافة
س14..كم مره احترقت الطبخه معاك ؟؟
والله الحمدلله مافيه شيء انحرق يمكن يكون فيه خلل بس حرق لا
س15.. اول كتاب طبخ اعتمدتي عليه ؟؟
أمي + أخواتي أنا ماعرفت كتب الطبخ إلا بعد ماتخرجت بصراحه كانت أختي الكبيرة الله يحفظها مسويه دفتر وإلى الأن نعتمد على الدفاتر وماشريت كتاب والله إلا قبل فتره اسمه النخبة
س16..مين قدوتك بالمطبخ ؟؟
بالتأكيد أمي وأخواتي
س17.. تحبي احد يساعدك بالطبخه ؟؟
أبدا بل بالعكس ماأحب الشوشره والكلام في المطبخ أحب أشغل شريط أو إذاعة القرآن واشتغل براحتي
س18.. اذا خربت عليك الطبخه ايش تسوين ؟؟ ترميها ولا تضطري تاكليها؟؟
لا طبعاً ياويلي من أمي لو سويت كذا ولا أحب بصراحه حرام أحاول أضيف طبقة أو أزينها أو اسوي أي شيء يضبطها
س 19 من اي مدينة انتي ؟؟
من المنطقه الغربيه
س 20 وماهي الاطباق الشعبيه المشهوره في مدينتك؟؟؟
السليق ،، المطبق ، المنتو ،،
س 21وماهو الطبق الشعبي الذي ما زلت تطبخينه وتحبينه ؟؟؟
الجريش ، العيش ، الخبزه
س 22 اكتبى لنا طبق مفضل من اختيارك ... او من مواضيعك فضلا ؟
بطاطس محشي :
بطاطس مطبوخ ومهروس + كشنة مكونة من ( دجاج مفروم أو لحم مفروم+ جزر مبشور + بصل + طماطم ) وتكون ناشفه تماماً
بعدها
تمسكي البطاطس وتكوريه وتفتح فتحه صغيره تحطي داخلها الحشوه وتقفلي الفتحه جيداً وتحطيها في بقسماط وتقليها في الزيت
غالباً اعمل فتوش أو سلطه وأرتبها في الصحن واصف البطاطس فوقها كنوع من التزيين
وبالعافيه
س 23 متى كان دخولك ل((امنتدى بني عمر))و كيف تعرفتي على المنتدى ؟
ناسيه متى دخلته كان بدعوه من وحده تقول بدل ماتكتبين في منتدى خارجي أكتبي في منتدى قبيلتك
س 24.. ما رأيك بــ الفكرة لقاء وحـــوار مــع ضيفة شرف نواعم ؟
جميله وصدقاً مادريت عن هذا الموضوع إلا أمس من الأزديه
س25 مـــيـــن ترشحى بعدك او ممكن تختاري اللي بعدك ..
أشكر الاخت الأزديه على الدعوة والله يعطيكم العافية جميع
وأرشح كاتبة الموضوع
انثى تختصر النساء
الله يرفع قدرك ويجزاك كل خير