يا مرحبا واهلين يا لافي الخير=ترحيبة ٍ ترقى متون الغماما
ترحيبةٍ واخصها لك بتسطير=امدادها التّبر المصفّى لزاما
عبيرها نفح الزَهرَ والنواوير=مخلوط بالمسك المعفّر ختاما
عنيتني بالبدع ما فيني آخير=ولا استخير آرد قاف النشاما
إلا عصبت الراس كني آبا طير=أزلزل الأفكار تنشد علاما
واقول ما به وقت راي ٍوتفسير=أنا جبل بركان وانتي الحماما
يا الله وانا طالبْك حسن التعابير=ولسان صدق ٍمثل حدّ الحساما
مهنّدٍ للحق ما عنه تحوير=ما ينطق إلا بالدرر مالكلاما
شكيت من حال البشر والتفاكير=تموج بك موج البحر لا تحاما
حال ٍ على الله المشاكى وتغيير=الناس للأحلى وترك الحراما
ماني بلايمْك ابورود ومصادير=الهم واحد مسهدٍ للنياما
حرصك له اعنايه وشكر ٍ وتقدير=ينمّ عن فكر الحريص الهماما
والمعدن الطيّب لأصل المناعير=اللي لهم وقفات صدق وذماما
لا بد لاهل العلم وقفه وتذكير=للغافل من اهل الردى والخصاما
واصلاح يبدا بالفتى دون تقصير=يصون نفسه عن مواطي الرخاما
وتآمر ٍ بالعرف حبٍ وتبصير=في السر يُبعد عن عيون الأناما
نصيحةٍ ما هي فضيحة وتشهير=تزين (ع) الخاطر بليا ملاما
واتمسّكن بالشرع في كل تدبير=محجّةٍ تهتك ستار الظلاما
واختامها صلّوا عدد زاهي الطير=على النبي ما ناح فرخ الحماما