تنام يا هم عن صدري واصحيك
كل ما ذكرت عيونها قلتلك قم

يا قلب كثرت في غيابه بلاويك
عقبه حياتك كنها طعم علقم

واذا طرالك شعرها بين اياديك
قلت اه يامطولك يالليل الاظلم

معنى السعادة في وصاله يكفيك
لاصار عندك عشت دنيا بلا هم

سافر و خلا جمرة البعد تكويك
في غيبته جسر المواصل تحطم

واليوم دونه حال باب و شبابيك
واول على نبرات صوتي يترنم

بعد الوفا والود عود و يشكيك
قال الفراق وطاري البعد صمم

قله علامك؟ وش غيرك؟ وش فيك؟
لا يستبيح الصمت خله يتكلم

نسى هذاك الحب ياقلب يرضيك ؟
ماكني حبيته ولاني ولد عم

هديته بالعيد خلاص مابيك
مادامها رغبته ياقلب تمم

اللي يبي هجرك وناوي يخليك
خله عساك برفقة الهمْ تنعم