يا خيال اسمعيني والله اني صدوق=ما نويتك بغدر ولا نويت اعتدي
وإن زعلتي علية فأبشري بالحقوق=والله اعلم من اللي بالخطا مبتدي
ليش بيني وبينك في التفاهم فروق=مثل مابين نجم اسهيل والا الجدي
انا ما جيت لك بالحب مثل السروق=جيت لك بالمحبة طيب واجودي
ما ادري انك تخطط لي وتبغي تبوق=مثل ما انتي استفدتي من محبك فدي
غابت الشمس عندك توها في الشروق=واظلم الليل توي ما عرفت اقتدي
كان ما للمحبة في محياك سوق=حدري في متاهات الخطر واسندي
مايدن الرعد من قبل لمح البروق=ولايحت الورق من غصن عود ندي
وانت تدري ولا كنك تحب العقوق=والسبب واضح والظاهر إنك ردي
صرت عندي تحت من عقب ماكنت فوق=وانا من دون شفك ما قصرت بيدي
وافي مانويت الشر طيب خلوق=وإن جهلتي علومي فأسمعي وانشدي
لا تحديني ازود على الطوق طوق=ركزي في كلامي وافهمي مقصدي
الطلب بالمقابل حق والحب ذوق=وانا من كثر حبي فيك قل اجهدي
مدري انك على فعل الخطايا شفوق=يوم جيت اتعدي ناوي تروح اتعدي
مير لا كبرت اللقمة تضيق الحلوق=والخوافي تبين اليوم والا غدي