قالوا لي طيّب قلت ماني بطيب
أطيب و جرحي بين الأضلاع ما طاب

يطيب جرحي لو حبيبي قريّـب
ومقابلين البيت و الباب بالباب

روحي فدى اللّي ساكنين الشعيّب
اللّي عليهم دمع الأعيان سكّاب

قالوا لي العذال أدله و سيّب
عنك المحبه لا تفتح لك أبواب

معقول أبسمع هرجهم في الحبيّب
وان قلت أبسمعهم فأنا أصبحت كذّاب

أول على العشاق أضحك و أعيّب
واليوم قلبي من هوى صاحبي ذاب

ياربي يالله طالبك لا تخيّب
رجاي يا مولاي في أعز الأصحاب