الليل باله طويل .. وما توقعته
يرمي علي المواجع في ربع ساعة

من يوم ما أسدل ظلامه وجّه أشرعته
على مواني التعب والضيق وأوجاعه

يا ليل : يا كثر همٍ بك تجرّعته
والقلب مستسلمٍ بالسمع والطاعة

يا ليل : لي صاحبٍ من يوم ودعته
والعمر متوقفٍ من لحظة وداعه

سلمته العمر .. شاله داخل أمتعته
واقفى وخلى لي الحرمان بأنواعه

لا الوقت جابه .. ولا الأحلام رجعته
والصبر يلوي ذراعي وألـوي ذراعه

مخنوق وإللي بقى من هالصبر بعته
ولا أدري إذا صاحبي .. كثر الغلا باعه

يا كثر للحب ما أغريته وشجعته
لين أصبح الحب ينبض داخل أضلاعه

ويا كثر للوصل ما حاولت وأقنعته
وبعد اقتناعه يغيب وعذره أوضاعه !

ويا كثر بالحب ما جاني ودلعته
أطرب لصوته وشعري يطرب اسماعه

كان بيدي بس مدري كيف ضيّعته
وضيّعت عمري معه والوقت شمّاعة !!

غيابه الموت .. لكن ما توقعته
يبخل على صاحبه في رفع سماعه