حنّا بنات الوطن وشموع ديجوره
= وحناّ بنات الوطن وأحلى سعوديه


منابت المجد وأصل المجد والصوره
= مرابط العز وسبوق النداويه


منابت الملح وأصل الورد وزهوره
= مكاسر العود والنفحه سماويه


عذبات الانفاس وأغلى المسك وعطوره
= نفحات الاشجان والنسمه ربيعيه


فوح الخزامى بروض ٍ قيل ممطوره
= قدِ علّها مع بكور الوسم وسميه


حنّا بنات الوطن سكناه وخدوره
= حنّا بنات الوطن والثقل ماريّه

تلف وإلا تزيد اللف لك دوره
= العلم بالهون والحاجات مقضيه


خذها على نور والرايات منشوره
= بالعدل والميز مكتوبه ومقريه


خذها وباقي بها وقفات مذخوره
= تجيك من فوق وإن حبيّت رديه

إن كان بالكون قالوا عينه وحوره
= بنت الوطن من عظيم الشان حوريه


بنت الوطن من جمال الخلق مستوره
= الطبع هادي ووقت الجد جديّه

ممكن تقوّم بوجه المعتدي ثوره
= والأصل تكوينها ثابت حياويه


شيهانة الحظ بنت الريح منثوره
= ملمومة الخصر بنت الذيب ريميه


يعني حجازية العينين مخبوره
= نجدية الخصر واللمحه خليجيه


ريحانة الفل بأرض الفل مبذوره
= يعني عسير وعبير أحلى عسيريه


وقاّدة الحس بالاشواق دكتوره
= يضيق صدر الزمن تبقى شماليه


تكتب حروف الوفا وتسّن دستوره
= بحروفها إخلاص وإن حبّت هواويه


يعني هي الجو مع بيداك وبحوره
= من رأسها للقدم بالزين مكسيه


سمعت ياللي حسبته لعبة الكوره
= بعض السواليف لا سقته عماويه


لا ضيّع الدرب مثلك وأخلف شعوره
= ندلّه الدرب والاعمال بالنيه


سمعت رد الاصيله وإفهم سطوره
= بسيط منساب والاوزان شعبيه


وإسلك طريق الهدايه وإحفظ السوره
= السوره اللي على المعنى ومكيه



ماهي بشرَبه من الغوري وشابوره
= بعض الحكاوي وفيه حدود محميه


خذها ولا أقول لا رديّت مشكوره
= من واجبي لا دفعت الشر والسيّه


بأول خطوط الدفاع وراس طابوره
= أصد وأرد والصدّه هجوميه