ياللي تبي تعرف أسراري وعنواني
الحزن والضيق واللوعة عناويني
وإن كان من جد يابن الناس تبغاني
في كل لمة حزن يمكن تلاقيني
يكتبني الضيق واللوعات تقراني
والناي من شرهة احزاني يغنيني
اجامل الصبر والأيام تعصاني
بالله قلي وش اللي معجبك فيني
فقير يوم إن عز النفس ما أغناني
لو قلت للفقر عزّ النفس مغنينيّ
كم واحدٍ ما شتمته لأجل ما أعطاني
وكم واحدٍ ما مدحته لأجل يعطيني
يقلقني الذنب لامنه تغشاني
يالله من الذنب والغفلة تنجيني
مافيه صوتٍ يشتت عني أحزاني
إلا بن شريم لاأم المصليني
مهوب دايم يصير لساني حصاني
كم غلطةٍ من لساني صدق تشقيني
من صغر سني وانا هالحزن يبراني
واليوم عمري تعدنّه ثلاثيني
صحيح ماني بمثل ابوي واخواني
رغم إن هقوات نفسي نوب تغويني
ما أمد كفي لكفٍ ماتمناني
ولا أسج رجلي لدربٍ ما يوديني
وما اكذب لكن اتجمل بعض الأحياني
يوم إن هالكذب صاير شي روتيني
فظروف أزرف عزيزٍ ماتناساني
وفظروف ادور مزرفني وناسيني
اعرف نبض الجفا فوجيه عدواني
واعرف نبض الغلا فاللي مواليني
والطعنة اللي تجي من صوب صدقاني
أقسى من الطعنة اللي من عدويني
كم مرةٍ مات دمعي داخل أجفاني
وكم مرةٍ اتفه الأسباب تبكيني
كذّاب لو قلت شعري يوم ما اشقاني
احيان يسرق منامي من جفن عيني
اكتب قصيدي عشان عيون خلاني
ومرات اجامل عشان ارضي محبيني
هذا إعترافي وانا مانيب ندماني
ممكن ابصم أو التوقيع يكفيني