ياحبيـبـي لايهمـونـك آبــد=الثقه بالنفـس عنـوان النجـاح
رأسك المرفـوع مايرخيـه أحـد=كل من حاول يمـد يديـه طـاح
خل للبسمه علـى ثغـرك وعـد=وإتخذ من هيبتك أقـوى سـلاح
وش يقول الشعر لو قـام وقعـد=أنت فوق الشعر جـده والمـزاح
ياعقوبة شاعرك مهمـا إجتهـد=كان عزف الشعر من نزف الجراح
ياهوى البال أمس واليوم وبعـد=ليت من جابك نصيبه وإستـراح
يانديـم الأنـس ياوجـه السعـد=يانسيم الليل ياشمـس الصبـاح
والله إن عينك تجيب أطلق ولـد=ينطلق من رمشها الموت الذحاح
تامر وتنهـى وتحكـم لـك بلـد=بالعيون السود والسحر المبـاح
طالبك سجل علـى قلبـي سنـد=خله يشعر بالرضـى والأرتيـاح
إعتبرني مـن ضحيـاك الجـدد=وإعتبر دمي على صدرك وشـاح
جيت فالوقت المناسـب ياوعـد=أخرجت كنز البحر هوج الريـاح
لعنبو قلـبٍ عـن أحبابـه رقـد=ماخفق له من هوى خله جنـاح
ياحبيـبـي لايهمـونـك آبــد=الثقه بالنفـس عنـوان النجـاح