يامنزل القرآن وكتاب الأنجيل=يالواحد المعبود ياذو الجلالي
لي طلبةٍ عندك عساها تساهيل=وإنت الكريم اللي عليك إتكالي
طهّر لي لساني من الزيف والميل=وإجعل لي بقولي سبيل ومجالي
الشعر يخلّد به فعول الرجاجيل=عاده ورثناها قديمٍ وتالي
والليله المحفل كرامه وتجليل=ليلة وفا للي إرتقى بالمعالي
سعيد أبو محمد حكيمٍ وحلحيل=ضابط ضبط كل الأمور الثقالي
من لابتن يوم الملاقى مشاكيل=بني عمرو نعم الأصل والرجالي
أديب ومتواضع وفي عينه تخيل=برقٍ من التقدير نوّه شمالي
سمح المحيّا عادته يوفي الكيل=مايوم فرّق بين عمٍ وخالي
ماله مع التعقيد درب ومواصيل=يقضي لزوم اللي حدته الليالي
وسيرة ثمان سنين تشهد لي القيل=ويشهد لي الشيبان هم والعيالي
والحق أصدح به ولافيه تضليل=واجب عليّه أذكره في مقالي
نودعك ياعلّ دربك تساهيل=وياعلّ تعشب لك وساع المفالي
وطاريك يبقى بيننا جيل عن جيل=نروي فعولك ياكريم السبالي
هذا وأنا من لابتن تِزبن الخيل=عاداتهم رد الوفا للرجالي
تمّت وصلوّا عدّ نبت المحاصيل=على رسولٍ بامره الشك زالي