الرابح اللي ما تجيه الفواتـــــــير = ولا وقع في سوق الأسهم ضحيه
ولا تزوج مدمنات الكوافـــــــير = ولاّ تورط في فتاة غبـــــــــــــيه
وأكثر عباد الله مثل المواطــــير = تشفط فلوسك ما تبقي بقــــــــــيه
ويا من تزوج بنت شيخ الهوامير = أعلم تــراها في حياتـــــــك أذيه
هذاك معروفٍ بكثر المسايـــــير = يقلب مواقيتك صباح وعشـــــيه
يأخذ ولا يعطي وقربه مخاســير = وإذا حصل وأعطاك منّ العطيه
هذي حقيقة مشتويين العصافــير = اللي بهم قسوة ونـــيــــــــه رديه
وأكيد به ناسٍ تزفّ التباشـــــــير = وجيههم بيضٍ وبه طيب نـــــــيه
رجالهم يسوى ثلاثة طوابـــــــير = وإن جات صيحه تعتليه الحمــيه
وبنيّهم ذكرن بحسن التدابـــــــير = في كل حاله ما تدور وصـــــــيه
الدين فيها والبنيه بها بخـــــــــير = لامن غدت من حامدات الهـــديه
من زوجها ماهيب من نافخ الكير = اللي يسبب للعذارا أســــــــــــيه
ولا تسمّع للطرب والمزامــــــير = ولا تقول لزوجها لـيــــــــش ذيه
وأنا بدوري ما حسبت المعايـــير = إلاّ بعد ما ضاق وقتي علــــــــيه
ضاقت بي الدنيا وكني وسط بـير = في ليل مظلم وأفلتتني يــــــــديه
والسالفه ماهي توقف وتغيــــــير = الســـالفه في العمر ما به بقــــيه
نطرد ولكن عاندتنا المقــــــادير = وأصحابنا قالوا تصبّر شــــــويه
وأنا صبرت وبآن بالعمر تقصير = من قسوة الماضي وقرب المنـيه
والحمد لله لو وصل حالتي ضير = ألقى الفرج من عند رب البـــريه