ليلـةٍ صاخـب الوسـم طارقهـا = والحنين لصاخب الوسـم طارقنـي
يـوم ضاحتهـا بـروقٍ تزارقهـا = نور من كـل النواحـي مطوقنـي
لـدّت عيونـي تخايـل دوافقـهـا = وانشعفت لـودق غـراً موافقنـي
يا علي حسبي على نوض بارقهـا = شوٌق الخافـق لهـا ليـن وهقنـي
خافقي لكـن غـدى كنـه خافقهـا = ما يمانـع يـوم تبغـاه يرهقنـي
تمتلك من قـدرة الملـح خارقهـا = بيدها تحيـي عروقـي وتزهقنـي
ما هقيت افوق للعشـق واعشقهـا = بـس سوٌاهـا غلاهـا وفوقـنـي
حسنها مـن كـل مالـذ طوقهـا = كنه اللي يقولِ لي غصب تعشقنـي
جل من نسـق عروقـي ونسقهـا = في دمي مثـل الولـه ماتفارقنـي
راويه والله مـن الوسـط ضيٌقهـا = حكمتـه فيمـا ذبحنـي وعلقنـي
ان تثنـت والصبـا هـز مورقهـا = حركت نبضٍ على الـود سايقنـي
وان رجف داني ثمرهـا وشاهقهـا = جيت مزنٍ برق الأشـواق دافقنـي
جنـةٍ للـروح صفـت نمارقـهـا = ياعلي وإن قلـت لـك ماتصدقنـي
كل صبـحٍ ينولـد مـن مشارقهـا = من حلاته قـال سبحـان خالقنـي
كـن شـلال الدجـا دون مفرقهـا = يلثـم أخطاهـا وللمـوت يرفقنـي
في المحبه ما نويت انـي اصدقهـا = ليـن غرّبنـي هواهـا وشرقنـي
كل بحـرٍ لبٌـس الملـح عاتقهـا = جيت له مركب من الشوق واغرقني
يا علي والشـوق نـاره لعاشقهـا = حارقٍ قلبـي ولا قلـت حارقنـي
مـن لطافتهـا وعنٌـاب منطقهـا = ذوقـت سمعـي وعيـت تذوقنـي
أحسـب انـي للقصايـد مشوقهـا = وأثرهـا الـي للقصايـد تشوقنـي
طفلـةٍ زايـد حلاهـا مزهقـهـا = مثل مـا زايـد دلعهـا مزهقنـي
قلـت للخفـاق ليتـك تفارقـهـا = قال يابن النـاس ليتـك تفارقنـي