مالاح بّراقه بعرض النو والبدو احتفَو=ومانسنس الغربي وحرّك من هواه عويّده
منّي سلام الله على المقدام والدرع الظفَو=ازكى تحيّه بالوفا ياهل الوفا متقيّده
أبهج من ارضٍ خاليه لاخذت لك حزّة صفَو=فيها ولا يطري عليك اللي نقد ونقيّده
طاري نباكم سرّني وجفون عيني ماغفَو=جلست افكّر فالسنين عجافها والفيّده
من فرحتي كنّي سجين صوتوا له بالعفَو=رحّب خفوقي واصعب القيفان قمت اقيّده
لاياحمد يبن الرجال اللي ليا قالوا وفَو=دعوتك لي عيدٍ من الاعياد جيت أعيّده
حتّى ولو زمّالتك فالوصل ماتكلّفَو=أقبلت ماقول الفرص ولاّ الديار بعيّده
علي يمين أن آصلك لو يلحق الرجل الحَفَو=في طاعتك وانت الأبو وأنا سواة وليّده
جيتك ابا اقبّل جبينك وأنهل العد الصفَو=وأشوف من شوفه يزيد من العمر ويزيّده
واشارك الحضّار واقطف ماحضو له وقطفَو=من روضة الشعر الجزل ماراغ عن متصيّده
مافيه شيخ الاّ انت انا اعرف والمطاليق عرفَو=انّك تعز المشتكي وقت القسا وتشيّده
شيخ بفعلك يوم بعض الناس للمال خلفَو=(شيخة ختم ) ولا دراهم فالبنوك محيّده
لا بالله الا انت الكفو ابن الكفو ابن الكفَو=والكفو مثلك لادعانا فاللزوم نأيّده
وجهك كما وجه القمر لابان لعداك أختفَو=ويمناك يمنى حاتمي ماتعطي الاّ الجيّده
لاتلتفت لو حاولوا ولطيب مدّاتك .. نفو=يغيضهم منهو على النّاله رقى برويّده
أن قالوا: انّك تنقصر عزّالله انهم ما انصفَو=تتعب على كسب الجميل وتعتلي لسويّده
لو كان فيهم خير ماخلّو العوايد وأنكفَو=لكنّ طبع أهل الردى مع الردي متحيّده
ومثلك عروقه فالبحر جدّانك اللي خلّفَو=ماتوا.. وذيك قصورهم على النقا متشيّده
جعل الحزن ماياصلك ولاّ جفونك لارفَو=واللي يحسّك جعلها تسري عليه( رشيّده )
لا واهني ربعك ليا جدرحوا من الدنيا شفَو=ولاواهني من أنت اخيه ان كادوا أهل الكيّده
والله لو كل البشر ضدّه تعادوا ووقفَو=انا اشهد انّه مايجيه الضيم وانت عظيّده
من قبلي الشعّار قالوا: في طباعك ووصفَو=وانا لو أكتب ملحمه عندك تصير قصيّده
وقصيّده في مدّتك تزها وانا أهتف وهتفَو=الين صارت ياحمد على الشعر متسيّده
يشهد على قولي: الرجال اللي تعدّو وسلفَو=والشعر يشهد لك وأنا اشهد يالعديم شهيّده
ان المراجل, والوفا, والطيب, والعز, حلفَو=ان الزمن هذا زمن الأسياد وانّك (سيّده)