ياليـل ياليـل العنـا مابـه رقـاد********* رقـدت ياليـل العـنـا مارقـدنـا


ياليـل والله مالنـا غيـرك مـراد*********انت الخوي مادام غيـرك جحدنـا


ياليل حنا اجواد واجـواد واجـواد*******وللحين ماني عارف(ن) وش قردنا


نفوسنا بالعـز نبنـي لهـا اعمـاد********ونموت جـوع وعمرنـا ماشحدنـا


ياليل انا لاهل الهوا صـرت طـرّاد********ناس(ن) خذوا قلبي وراهم طردنـا


وياليل انا لبحر الهوا صـرت ورّاد********مدري وش اللي صار لكن وردنـا


واصبحت انا فبلاد والزيـن فبـلاد********هـم ابعـدوا عنـا وحنـا ابتعدنـا


غابت وصرت اجاهدالنفس بجهـاد*******نطلبـك يالله لاتخـيـب جهـدنـا


مدري هي ظروفه او الحـظ مـاراد*******او دعوة(ن) ياليل صابـت احدنـا


مابيننـا شكـوى ولابيننـا عنـاد********حب(ن) جمع قلبين لااكثر ولاادنـا


حبيبتي رغـم المسافـه والابعـاد********في حبنا يابنـت كـل(ن) حسدنـا


في ذمتي لو الغـلا ارقـام واعـداد*******فقلوبنا محـد(ن) يسـاوي عددنـا


احبها مـن قلـب صـادق ونشـاد*********هـي الوحيـده وغيرهـا مانشدنـا


كل يوم في قلبي للاشـواق ميـلاد*****كل مايزيد الوقـت بالشـوق زدنـا


راحت ثلاث سنين والجـرح وقـاد********غصب(ن) علينا ماوفينـا بعهدنـا


الموت كان الصبـر طـوّل ولافـاد********عقب التعب ياليل وش استفدنـا ؟


وقديم قالوا ان الهوا زرع وحصـاد*******وحنا زرعنا اكيد بس وش حصدنا ؟


وياليل ياليـل العنـا مابـه رقـاد********تـدري فمـان الله وباكـر وعدنـا