يا الله أنا طالبك يـا عالـم الحـال = يا اللي رزقت الطير بعـد الخماصـه
أرزقني السلـوان والصبـر والمـال = واشف المريض اللي بروحه خصاصه
واصلح لنا يـا ربنـا كـل الأعمـال = وتساعد اللي ما تعـدى اختصاصـه
يقولهـا رجُـلٌ تعامـل مـع رجـال = يعرف خلاصه ما أبتلش في خلاصـه
لكنهـا الأقـدار مـا دونهـا أقفـال = مكتوبةٍ في اللوح ما هـي قصاصـه
والكلمة اللي جات من طيـب الفـال = طاحت على قلبي مثيـل الرصاصـه
وأنا عريب الأصل ما أحـب الأنـذال = ولا تصاحبـنـي دروب النقـاصـه
والخير موجودٍ علـى كـل الأحـوال = متعود على الجود ما أبغي الرخاصه
وأبـوي ربانـي وعلمنـي أمـثـال = ودرست في الدنيا وأخذت الخلاصـه