بدينا بذكر المعتلي الواحد المعبود =جزيل العطايا في يدينه ويعطيها
ومن يطلب الله صادق يلتقي المردود =ولا خاب راعي دعوة يوم يدعيها
أسأله يصبرني على حظي المقرود =ويذهب هموم في فؤادي ويمحيها
ويا رب ترحم حالتي يوم يبس العود =فلا عاد ينفع في عظامي مداويها
وأنا أحس في قلبي كما النار والبارود =ولفح السموم اللي تجينا بحاميها
وأنا ساهر في الليل والمسلمين رقود =وعيني هجرها النوم ماعاد يلفيها
وحيد المجال ولا لقيت الذي مقصود =تصافق بي الدنيا وتزعل وأهديها
أدور طريق النور لكلن طلع مسدود =وروحي عليلة يا الله أنك تشافيها
وقالوا كثير الناس يا حاسد المحسود =ترى هذي الدنيا كثيرة بلاويها
وأنا أحسبك يا المذكور باقي على المعهود =تراعي الظروف وتعطي القوس باريها
ولكن هذا اليوم أتعبت روحي زود =وحطيتني في نار ما أحدٍ يطفيها
وأنا يوم جيتك والله اني معك بالجود =ومن عز نفسه لازم انه يراعيها
وترى ما على وجه البسيطة بقاء وخلود =سواء رب هذا الناس علاَّم خافيها
وفي الخاتمة مني صلاةٍ على الموعود =بجنات عدن جعل منزالنا فيها