يا كثر ناسٍ همّها البيع والسوم=ناسٍ بنت فوق الشماته مراقيب
ويا قل ناسٍ توفي بفزعة القوم =ناسٍ تفز بطولها فزة الذيب
عد المراجل بين الأول وذاليوم=واخصم من التاريخ راعَ العذاريب
شخصٍ تعده نشمي وفارس لزوم =وشخصٍ فعوله كلها شيٍ مريب
المرجله بين العرب عرف وسلوم=عقل ٍ كبير ولو نخيته لك يجيب
ماهيب رزه وقولة الناس مرسوم= الناس بكره في يديها مخاليب
لا تأمن الكلمه إذا القلب معدوم= البعض يضحك لكن بداخله عيب
هذا يدور زلة الخلق مذمــوم=وهذا دروبه من فعوله به تخيب
طبع النذل من فايح الطيب محروم=و الحر نفسه عطرها دايم الطيب
ياخوي كانك تعبد الله وتصوم=افهم كلامي قبل ما راسك يشيب
لا تقول بنت وهرجها هرج مزعوم =صحيح بنت ولكن حروفي تصيب