يـا عاذليـن القلـب لا تعـذ لونـه=خلوه يا خذ في هوى الزين سجـات
خلوه يا خـذ نظـرةٍ مـن أعيونـه=دام أقدر أشوفه ولو بعـض حـزات
الْيا حصـلْ فرصـه فـلا تحرمونـه=شوف الحبيب اللي على البال بالذات
شوف الحبيب اللي بهرجـه ليونـه=يشفي أجروح في الضمائـر خفيّـات
يشفي الحشا والقلب يبعـد أحزونـه=ويرد لي عقلي ولـو كـان لحظـات
لكن أنـا لا جيـت لا العـود دونـه=واقف على دربـي ولا فيـه حيـلات
عـودٍ لِيـا جيتـه تعقّـد أجفونـه=من شوفتي ضاقت عليه الوسيعـات
كنّه على جمـر الغَضـا يصلبونـه=ما فيـه رحمـه للقلـوب الوليفـات
أثر الحسد بعض العـرب يعشقونـه=والعود هو راس الحسد سبع مـرات
ما هي تـرى مـره لجـل تعذرونـه=قضت حياتي بيـن روحـه وجيّـات
قضت حياتـي والغضـي يمنعونـه=عن شوفتي جو له على الباب علات
علـة أنحـور خاطـره يكسـرونـه=شاف القهر منهم ولا لـه مجـالات
وأرجع وقلبـي يابسـاتٍ أغصونـه=ما شفتها حتى ولـو كـان نظـرات
أسْهـر وسـدّي بايحـاتٍ أكنـونـه=في مُهجتي شبّـت لواهيـب نِيـرات
واجرْ صـوتٍ بالسحـر يسمعونـه=العالم اللـي نايمـه مثـل الأمـوات =
سُكـان رفحـاء والحفـر يعرفونـه=بذاك الزمان اللي مضالي وقد فـات
وأهـل شـروره عادهـم ينشدونـه=وش عذبك يا القلب في حب ترفـات
وأقــول أنــا بالله لا تسألـونـه=مجروح والمجروح مالـه أعلاجـات
إلا عـلاج عنـد ضافـي أقـرونـه=الصاحب اللي حط في القلب هـزات
هـز القلـوب العاشقـه والحنونـه=هز الـزلازل فـي طويـل البنايـات
ولا مثـل بـرج تساقـط أركـونـه=أبراج بوش اللي بوسـط الولايـات
من لامني يا نـاس تكثـر أطعونـه=ويجيه ما جاني من الحـب لوعـات
ويبقى مريض والعرب مـا يجونـه=راحت حياته كلهـا فـي العنايـات
حتى يعرف الحب وأيضـا شجونـه=والحب من قبلي أعصـوره قديمـات
من عصر قيس اللي غدتْبه أجنونـه=من حب ليلى صابه أسهوم وآهـات
حتى فقـد عقلـه وكثـرت أغبونـه=يمشي بليّـا ثـوب ويهـل عبـرات
يهل صافـي الدمـع مـا يرحمونـه=ما خافوا من الله شديـد العُقُوبـات
وأنـا كشفـت مخطـطٍ يرسمونـه=مخطـطٍ سـري وفيـه أشتباهـات
حتى عرفـت اللـي تراهـم يبونـه=قتلي وقتلي صار مـا فيـه شكـات
صار الهدف واضح وهـم يكتمونـه=وأقفيت عنـه ولا حصلـي زيـارات
فبالله يا للـي كـان خلـي تجونـه=قولوا ترى صاحبـك ذاق المـرارات
ذاق التعب كلـه وشـاف المهونـه=من جيّةٍ ما صـار فيهـا سويعـات
ساعة مع المزيـون لـو يتركونـه=عندي ترى أغلى من قصور وعمارات
الصاحب اللي شد وأقفـت أضعونـه=منساه والله لـو تطـول المسافـات
منسـاه دام النـاس لـي يذكرونـه=دامه على عهده وهو حي مـا مـات
وترى العهد من طبعنا مـا نخونـه=سلم ٍ لنا لو كان في الوقـت ميـلات
سلـم ٍ لنـا العُقـال مـا ينكرونـه=لو أنكروه أهل القلـوب المريضـات
وجعل السحاب اللي تخالف أمزونـه=يسقي ديار الزين في كـل الأوقـات
حتى العشب ينْبَـتْ وتكثـر أفنونـه=ويبقى على مر السنيـن الطويـلات
وصلوا على اللـي دائمـاً تذكرونـه=محمد المختـار بأزكـى الصلـوات