مثل تالي النهار اللي تقفاه ليل=والشفق تحت قرص الشمس متبعثري
يالله انّي دخيلك يامنجي الدخيل=جعلني دايمٍ متهوم ونا بري
مايذل العزيز ولايعز الذليل=كود مسرى الخطا في ليل ماينسري
حسبنا الله على الظالم ونعم الوكيل=كل ماشفت طلة زينب العسكري
ياوجودي وجود اللي عشق مستحيل=قلت وش تحتري وقال وش تحتري
قلت طرقي ومتغرّب وعابر سبيل=والمصيبه هنا يابري حالي بري
والله اني من الوزن الثقيل الثقيل=مير بعض المواقف ماتجرّي جري
مادري ويش احط ولادري ويش اشيل=بس اغني كذا يالابس الغندري
زينب العسكري BMاخر موديل=ماركه عالميه تتعب المشتري

ايها الشاعر اللي ماتجيب الهزيل= والمواضيع عندك بالدبل والثري
لك سلام وتحيه صافيه سلسبيل= عقبها السمن يجري فوق تمر السري
ودي امشي معك لو ان مالي حصيل= غير مانيب من بعض المعاني صري
يوم شفتك تمَثَل بالكلام الجزيل= يوم شاهدت طلة زينب العسكري
فتنةٍ فالبساط الاخضر المستطيل= خلّت اللي مع المضمار يجري جري
مايلوم الدليل يكون ضايع دليل= والحقايق حقايق تكتب وتنقري
لو رآها الفرزدق جر صوتٍ طويل= وجاوب الصوت ابوتمام والبحتري
لااقبلت كنها جو الصباح العليل= ناطحتها الهبوب وعَرْشهَا منفري
من نظرها على الشاشه دموعه تسيل= وقال ياناس انا متجوّزٍ عسكري
كل يومٍ تمشّى في جنازة قتيل= والضحايا جماهيرٍ تحب العري
حسبنا الله على الظالم ونعم الوكيل= قالها الاكلبي يوم قالها الهاجري