لا تكسـر الفانـوس والليـل داهـم=اترك بصيص النور يمكـن يقدّيـك
مثلك يصيـر بلعبـة الوقـت فاهـم=لو ما عطيت الوقت وش لون يعطيك
الغـاوي اللـي بالخيـالات واهـم=لا يسمع الهـادي ولا هـو بهاديـك
لا تستمـع لاهـل النمامـه تراهـم=يبون شبـة نارهـا بيـن أهاليـك
واحرص على جيران دارك عساهم=يثنون لى جاك العدو طامـع فيـك
الأهـل تقـوى بالمـودة عصاهـم=والقوم تخشى جمعك اللـي يباريـك
ماتبري القلـب العطيـب الدراهـم=ولاتعيـد العافيـة كثـر اداويــك
حار الفكر والطرف بالليـل ساهـم=وشوفـات فكـري بددتهـا لياليـك
ثـور عجـاج مدلـهـم وجـاهـم=وراه نوٍ ناصـي خضـر أراضيـك
الله ينجـي دارنـا مــن بـلاهـم=والله مـن شـر الليالـي ينجـيـك

سلام لكْ يا من مـع السيـف دايـم=مرحبْ وحيّـا الله سمـوّكْ وأهليـن
ترحيب ما شنّـت سحـاب الغمايـم=وسالت الوديان وصبـت ببحريـن
يحميك يابْن الجود يابْـن الأكـارم=مع بنيْكْ لي هم على النّهج شدّ يـن
تعيـش ياخالـد وللحـق صــارم=في نصْرة الاءسلام وفي نصرة الدين
تسمو مـع العليـا أميـرا وحاكـم=بمنطـق الحكمـهْ وقـول المحقّيـن
تظـل بالمـعـروف والخيرقـايـم=أدعيهْ واْختم فـي د عائـي بآميـن
مع الحكمْ قال بْـن نشـوان هايـم=بهـا تلـوّع مثـل لـوْع المحبّيـن
قال الحكيم من كان ساري وعـازم=قبل الطريق يختار اذي هو يهدّيـن
الناس بالناس في غثـى أو سلاهـم=وأفضل الناس لـي تراهـم ملبّيـن
مالي وصحْبهْ في السّلـى والسلايـم=وساعـة الشّـده وضيقـي مولّيـن
الشّهـم الـي تلقـاه والليـل داهـم=مثل البـوارق أو نجـومِ تضوّيـن
والغاوي اللي في الخيـالات واهـم=يغويكْ.. فلا تسمع لقـول المظلّيـن
والجار ولو جار واصل الجار ولازم=تلقاه حازب فـي وجـوه المعاديـن
وغلْمتكْ بالوصـل قـوّي عصاكـم=أعداكْ لا تْبلّـوا يعـودوا مـذَ لّيـن
والمال بعض الناس ربـي ابتلاهـم=الرابحيـن المنفقيـن والمزكـيـن
والخاسريـن يـا ويلهـم ياعزاهـم=مبذريـن أو مسرفيـن أو مضرّيـن
والمعْدمين المرتضيـن يـا هناهـم=الصابرين بشرى بثقـل الموازيـن
حبّـي لخالـد حـب عاقـل لفاهـم=ومـن بقولـهْ أو بقولـي ملمّـيـن
واْحباب ظلّوا في الفوءاد ما نساهـم=مهما ومهما فـي فـوءادي مسوّيـن
متى متـى ياليـت شعـري أراهـم=وليت شعري ما عرفـت المحبّيـن
واْزكى الصلاهْ عليك يانسل هاشـم=ما حجّوا الحجاح وصلّـى مصلّيـن