بن عزيز يقول ياللي بالخفى ترميـــــــني = خاف ربك وأنتبه من العالم الطـّـمـــــاعه
لاتطيع الشـــــاعر اللي دائماً يـهجــــني = يحسب اني رحت يوم ان الخبر مـا ذاعه
لاتقول اليوم مشـــغولٍ ولا يــمــديـــــني = لازمٍ ترضي الصـديــق ولا تـلـــفّ ذراعه
ولاتقول الشــــعر والله ما يؤثر فـيــــــني = الشعر غيّر مسار البحتري وأتــبــــــــاعه
وأنا صـدّاقٍ صـدوق ولا تـغـيـــر فــيـــني = غير مضمون القصائد وأهلها الـجــــــزّاعه
والقصيده يوم تغضبني ولا تـــرضـيـــــني = أطفي الأنوار وأطلبها لبيت الـطــــــــاعه
ولاّ أروّضـهـا وأحـطّ خـطـامه بـيـديـــني = وأمتطي صهوة جواد الشعر في مربــــــاعه
وأنا يوم أعطي بخيلٍ ما أنتظر يعطيـــني = البخيل بخيل لايمكن تزين أوضــــــــاعه
وإبتسامه من صديقٍ صادقٍ تـكـفـيـــــني = والشفاعه من عدوّي ما تعدّ شــــــفـــــاعه
والصديق اللي كريمٍ مسكنه في عيــــــني = جعل روحي له فدأ حتى تقوم الســــــاعه
لو طلبني في الوصال أجيه ولاّ يجـيـــني = والكرم فيني وهو راعي الكرم بـــأنـــــواعه
وأكثر الأصحاب يشبه منتجات الصيـني = ما يدوم ولا يفيد إلاّ مجرّد ســـــــــــــاعه
والليالي السود يظهر فجرها ويـبـيـــني = يفضح اللي في ظلامه مستتر بــقــنــــــاعه
والسباع تموت من حر المناخ الكيــــني = والمناخ اللي مناسب ما تموت ســـــــبـاعه
والكلام اللي وصل من واحدٍ يعـنـيــــني = والله اني لأضربه حتى يمـد أربــــــــــاعه
وحتى ينسى مذهبه راعي الكلام الشيني = ويتغير منطقه في المجتمع و أطــــــــبــاعه
قالها اللي واثقٍ ما يتبع الـتـخـمـيـــني = له تجارب والزمـان أحفى عـلــيـــه ولاعه
وان طلبت أطلب إلهٍ في السماء يحميني = من عيون أهل الحسد والألسن القــطــّـاعه
ويتجاوز عن الذنوب وطالبه يـنـجيـني = من مصائب ذا الزمان اللي تزيد أوجــــاعه
وأطلبه في الصبر والطاعه ويحفظ ديـني = ديني الإسلام يوم النفس له مــــطـــــواعه