جاني يقول: الهم يا بنت مشقيك=لا واحسافه كيف قلبه يطيعه
قلت: ابتعد لا تسمع جروح مغليك=ما ودي بدمعك يغرّق ربيعه
قال: الحزن وشم ٍ على ربوع خديك=حتى الليالي من طعونك رضيعه
كانك نويت البعد يا بنت وش فيك=ردي ترى صمت الموادع فجيعه
قلت البكى طوّل وأنا اليوم بعطيك=قصة شقاي وخوط حزني وريعه
أبكي جروحي وأبكي الحظ وأبكيك=وأبكي زمان ٍذل نفس ٍرفيعه
وأبكي البرائه والرجا الله يخليك=لا تبعدين ووسط قلبك وديعه
ما تنفع الذكرى إذا حب طاريك=يجزل عظيم الطيب يحكي صنيعه
قال: أسكتي تكفين ربي يجازيك=هذا الزمن إن طاع وألا نطيعه
يا بنت كانك ليل في عيني آسريك =وكني نهار ٍ فيك شمسه طبيعه
أدري عليله يا عسى الروح تفديك=وادري جروحك من ألمها فظيعة
ومتأكد إنك نجمةٍ فوق عاليك=ما ترضخين لكل نفسٍ وضيعه
لا تلفتين الطرف للي معاديك=تفي المواجع لا تصيري تبيعه
قلت : العفو يا سيّد الناس يابيك=من حالتي ضاقت عليه الوسيعه
والضيق من زوده معَ الوقت ينهيك=انظر لحالي وأنت تعرف صنيعه
يا سيّدي أشكرك واشكر مساعيك=واشكر شعورك يوم جدت بنزيعه