قالوا كذا مبسم هيا .. قلت لا لا = بين البروق وبين مبسم هيا .. فرق
ويالله .. بنوٍ مدلهم الخيالا = طافح ربابه .. مثل شرد المها الزرق
لا جا على البكرين بنا الحلالا = ولاعاد لا يفصل .. رعدها عن البرق
يسقي غروسٍ .. عقب ماهي همالا = وحط الحريق ديار الاجواد .. له طرق
يسقي نعامٍ .. ثم يملا الهيالا = ويصبح حمامه ساجعٍ .. يلعب الورق
جريت انا صوت الهوى .. باحتمالا = في وسط بستانٍ .. سقاه اربعٍ فرق
طبّيت مع فرعٍ .. جديد الحبالا = وظهرت مع فرعٍ .. تناوح به الورق
روشن هيا .. له فرجتينٍ شمالا = وبابٍ على القبله .. وبابٍ على الشرق
مبسم هيا .. له بالظلام اشتعالا = بين البروق .. وبين مبسم هيا فرق
برقٍ تلالا .. بأمر عز الجلالا = واثره جبين صويحبي .. واحسبه برق
يا شبه صفرا .. طار عنها الجلالا = طويلة السمحوق .. تنزح عن الدرق
له ريق .. احلى من حليب الجزالا = واحلى من السكر .. الى جاء من الشرق
حنيت انا .. حنة هزيل الجمالا = ينقض ردي الخيل .. قد حسة الفرق
ويا قلتةٍ .. في عاليات الجبالا = ماها قراح .. مير من دونها غرق
ماعاد للصبيان .. فيها احتمالا = من كود مرقاها يديهم .. غدن طرق
قالوا تتوب من الهوى .. قلت لا لا = الا ان تتوب .. ارماح علوى عن الزرق
قالوا تتوب من الهوى .. قلت لا لا = الا ان يتوبون .. الحناشل عن السرق
قالوا تتوب من الهوى .. قلت لا لا = الا ان تتوب الشمس .. عن مطلع الشرق