رعى الله جبين صبّح العمر با احلى أشروق=طرد ليلي الرابض على نزف الأعماقي
يسلم سلامٍ باأحسن القول والمنطوق=حروفٍ تناغم كَنّها نبع رقراقي
هداني من البسمة كما برقة المفتوق=يجلّل شفاه التوت من شَهد الأرياقي
هزمني بنظرة رزّمت حول قلبي طوق=وصرت السجين اللي بلاحبس واطلاقي
جديله على متنه تضوي وراه أبروق=وعنق الغزال اللي قهر كل الاعناقي
نهوده كما الرمان مروية الغرنوق=وجيده مرايا البدر في ليل غسّاقي
يميّل بكف الورد في غصنه الممشوق=ويغضي بشوفه مالمح لمح سراقي
شفوقٍ على قربة ومن حالتي مشفوق=واهذري إذا سجيت به حزّة إفراقي
صغيرٍ إذا شفته وفي كلمتي مخنوق=واسيّل دموعٍ وقعها وسم واحراقي
على الله على الله خافقٍ ماغفى له موق=يدُوْج البراري حاير الفكر والساقِ
زمان الرضا ما أحلاك ياعطري المعتوق=تلاعب بروحي لعبةٍ كسبها باقي
متى يسعد الخاطر على ما اهتوى ويروق=ويسْلَم من أحوال على بعد وارهاقي
عسى ما أعدم الغالي فله في الضميرأعروق=تروي جفاف القلب بالدم خفاقي
حبيبي فديتك شلّ بالصوت والطاروق =لقلبٍ من الفرقا حزينٍ ومشتاقي