سلامْ ياللي صوتها ابطا ولاجا=سلامْ من قلبٍ حنونٍ ومشتاق
حبك محاصرني مع كل فجّا=وغيرك ترى يابنت للعين ما لاق
ما عاد لي من طيحة الحب منجى=القلب مايقوى تعاذيب وفراق
الجو من حولي غبارٍ وعجّا=عامين جوي من سبايبك ماراق
القلب فيك التاع والفكر سجّا=وانا على خطوات الاوهام منساق
امشي على رجلٍ كسيرة وعرجا=والشمس مابيّن لها عندي اشراق
ان كان لي في الحب يابنت مرجى=مرجاي قلبي لاتزيدينه احراق
فعز الله انك لي ملاذٍ ومنجى*=وعز الله اني لك على الدوم مشتاق