يابوسامي كلمة الحر ترفع من مقامه = وموقفه يجبر جميع البشر تثني عليه
ماتفرق بين فعله وصدقه في كلامه= ولا نصيته قال ياضيف جاك اللي تبيه
والله ان الضيف يحتار في زود احترامه= والفقير يودع الفقر من مدّة يديه
والردي لو يلبس البشت ويلف العمامه= ماتغير نظرة الناس لبس يرتديه
طول عمره ينقل الكبر ويحب الزعامه= ذاك في فعله مرائي وفي طبعه سفيه
يابو سامي ياسليل المروه والشهامه = جيرتك تاج على رؤس بيضان الوجيه
للوفاء والطيب والصدق في وجهك علامه= ومن يخاف الله تلاقي دروب الخير فيه
أنا شاعر وأعتذر لو حصل بعض الملامه= عادت الشاعر الى قال قول يحتميه
يشهد الله مارضينا على جرح الكرامه= وأنت شاعر تفهم القصد والقول النزيه