حسبي الله يا زمان مو زماني
فيه جدات المصايب تحتريني
كل ما ضاقت علي قلت امتحاني
حكمة الله بمتحانه مبتليني
لين ما صبري زهق عوج المحاني
ارتحلني وابتدت فيضة كنيني
أدري اني لو بفضفض ما مداني
ينتهي عمري وحزني ممتليني
سبة اللي في الهوى صوبه رماني
حظي العاثر مع حوبة سنيني
لو بكيفي ما أبيه ولا يباني
مو بكيفي يوم ابيه وهو يبيني
مبطي اترجى المشاعر واتعصاني
لين ما جابت زمان العيد فيني
غاب عني يوم توجته حناني
مثل ما أنفاسي تتوج أكسجيني
دام يدري فعلته في هواني
لو بعد ولا قرب يوحي ونيني
ليه ما يقرب ويجبر لي كياني
ليت كسري كان في احدى عظمتيني
يا رفيق الهم يا عازف كماني
ملت القيفان هاللحن الحزيني
ماش درب للحزن الا ومشاني
تضرب أمثال الأسى من شوف عيني
شوف عيني وانت تدري ما عطاني
الزمن ما غير دمعات الحنيني
وان دريت انه بقلبك هو مكاني
جد لفى نوم النهايه مغلتيني
وان تيقنت ان زماني مو زماني
شيل ذنبي وعيش دوامة سنيني