ناداه موته وأمطر الحزن ونّات =راح بقدم ساقه لـحتفه يلبيه
ضمه على صدره ويلفظه سكرات =والروح فاضت ..حق يا عين تبكيه
عشرين عام/ وودع الناس بسكات=اطلق عنان الحزن في قلب مغليه
الأهل كلٍ صاح بالصوت ما مات=كل ينادي(يا علي) وينك أش فيه
طاريه عودٍ فاح طيبه وبالذات = وسط المجالس شيخ وأمير يطريه
ما للسفر حاجة و نمضيه حزات = نضمى اللقا والوقت ما عاد يمديه
الموعد اللي نحتري فيه هيهات = حل الفراق وكل زفــره تناديــه
يا موت غفله جيته بطرف لحظات= في خاطري من طيب صيته أوفيه
أشوف طيرٍ بالسما ماله أصوات = سربه مثل حلمٍ تمنيت أحاكيه
أسأل عيونه كم من الوقت قد فات = يمكن جوابه يروي القلب يشفيه
أهز غصن الحزن وانثره دمعات = وأوراق شوقي تنتحب في نواحيه
نبضك ترى يا قلب طمئنه بآيات =ودمعك ترى يا عين بالصبر حفيه
الموت حق.. وجعل روحه بجنات= تغنيه عن دنيا.. دنيه بتشقيه
وأسأله ربي عالم بحال الأموات = يرحمه في قبره وبالعفو يجزيه