اللي شبابه تحدى الجيل = هوشف قلبي ومطلوبه
أصفى جبينه من القنديل = وخدود بالنار مشبوبه
والخشم ممشوق مثل الميل = والسيف يأخذ من اسلوبه
وعيون كحلا بلا تكحيل = خجلا ونجلا ومذيوبه
وجفون بالوصف والتحليل = من سحرهاروت مسلوبه
ورموش تنشر جناح الليل = من فوق صفين مهيوبه
وسنون براق نجم سهيل = سرى على الشرق لاهوبه
والشهد من مبسمه والهيل = وشفاه بالتوت مخضوبه
والشعر زافات شط النيل = من فوق الأمتان مسكوبه
والعنق ياعنق شقراء الخيل = من خيل بغداد منسوبه
والصدر رمان وادي السيل = مرابي الطايف عجوبه
تنثري ياورود ابريل = على ذراعين رعبوبه
والبطن مسلوب منه حيل = حارب طعامه ومشروبه
ملوي ومطوي وخصر نحيل = ان كان في الخصرعذروبه
وارداف شالت هدومه شيل = والموج يرقص على ثوبه
منسوج في روعة التشكيل = الوان في بعض مضروبه
والساق ياويل قلبي ويل = من الذهب صاغ مصبوبه
في كعبه القيد والتحجيل = رجله على المشي مغصوبه
جسم الرشاقه يجر الذيل = مايلمس القاع عرقوبه
واقدام رقت بلا تطويل = واظفار بالجمر مكتوبه
لوجاز لكفوفه التقبيل = قبلت كفيه مقلوبه
غيداء غدى زينها تهويل = لا ياهوى بس لي توبه
سبحان من فصله تفصيل = اعطاه حسن ابن يعقوبه