نوى المرواح مصحوب السلامة =بعد ما ولع القلب بغرامـه
تركني وارتحل يا طول ليلي =متى بيرجع لنا ظبي العدامـة
خذوله يا هل المعروف مني =سلامي له وردولـي سلامـه
وأنا لولا الحياء لآصيح بأسمه =ولكنـي اجنبهـا الملامـة
أخفي عن جميع الناس حملي=مثل مااخفيت جرح من سهامه
ألا يالله قربني من اللـي لي منـه= غـاب تجرحنـي هيامـه
لقيت النوم من عقبه محرم =واشوف الناس من عقبه ظلامـه

أناديه يا هلي محدٍ يردي=أنا روحي من الفرقى خطيـرة
على اللي بالهوى بياح بسدي =ونفسي ما تبي مخلوق غيره
عقب فراقه دمعي فوق خدي=وقلبي ما قوى فرقى عشيره
أخذ قلبي وأنا ماهو بودي=شكيت الحب وابديت السريـره
أشوف الحظ جاير ومتحدي =صحيح مصيبة العاشق كبيرة
أنا محتار مدري وش أبدي =يباريني غلاه ابكـل ديـرة
ولا به من يجبه ولا يودي=سلامي للغضي وسط الجزيرة

أشوف النوم عيا ليجيني= حارب عيني ولا ادري وش علامـه
خذاه اللي خذاني يوم شفته= ما بين خزام وأطراف الزمامـه
شبيه الريم ما بالناس مثله= جميل وزاد حسنـه فـي كلامـه
تربى في طرف وادي حنيفه =رفيع الشان مصيون الكرامـة
طلع من قلب نجد بكل زينه= وبالطعس الحمر بنـى خيامـه
شروق الشمس بالروض تمشى =وبعد العصر في راس العدامه

طال السهر والهجر بانت مواريه =من الصاحب اللي ما نويت الردابه
لو طالت الأيام ماني بناسيه= وان غاب جتنـي علـةٍ مـن غيابـه
يا طول ما مديت حبل الرجاء فيه= وهو معودنّي بطلـف وحبابـه
واليوم ما جاني وانا صرت ما اجيه =وعقب الغلا يجيه مني مهابـه
أحب صدقانه واعادي معاديـه =وافـرح لمرسالـه وفلـت كتابـه
القلب بانت يا بو بندر خوافيه =وما جابت الورقه من النـوح جابـه

ياعلّ قلبٍ ما شكا الحب والتاع= تنهار من فوقـه محانـي ضلوعـه
يا ما نهيت القلب لا شك ما طاع=ما طـاع يدلـه والليالـي تلوعـه
أثر المولع دمعته تجرح القاع=والى ذكـر مـا فـات هلـت دموعـه
يفز قلبي تالي الليل مرتـاع= أخـاف تبعـد عـن ربوعـي ربوعـه
الموت كل العرف عقب البطا ضاع=والمنتحي يا سعود صعبٍ رجوعه
في غير شوف العين ما نيب طماع=حقه علي أمشي بدرب المطوعه
أبو عيونٍ رمشها سود ووساع =في ذبحهـا العاشـق فتـون وتبوعه