قريب الفرج يا دافع الهم والعسر =فك الضجر تمحو الكدر كن لنا معين
حل عسرتي سألك بطه وبالزبور =والبيت والحجر المعظم مع الحطين
محمد شفيعي سيدي وصلة البشر =في يوم لا ينفعنا لا مال ولا بنين
صلاتي تخصه عد ما رشرش المطر =وما حثحث الركبان للبيت زائرين
يقول الفتى بو ناصر قد ذكر =مضانين عيني يوم أمسوا نازحين
فيهم كحيل الطرف أهيف أزج حور =مدلمج دعج أغنج مغنج غنج فطين
له غرة بيضاء كما طلعة القمر =ونون الحواجب ملتوي زجلها قرين
هلكني ملكني هاشني باهي الغرر =محني وعذبني وانا ناصح أمين

كل ماقفيت ناداني تعال=وكل ماقبلت عزّم بالرحيل
الحقيقة غدت مثل الخيال=هو عدوي وهو أوفى خليل
شفت أنا الظلم في بعض الدلال=يجرح القلب لو كانه جميل
يوم أنا أجنبت واعدني شمال=ياهل الود ضيعت الدليل
أشهد أن الهوى مابه عدال=هو خليل وأنا قلبي عليل
كل ماقلتله يابن الحلال=المحبة ...عطه وإنت بخيل
التفت يمي وهوعجل وقال=لذة الحب في الشي القليل
كل ماقفيت ناداني تعال=وكل ماقبلت عزم بالرحيل
الحقيقة غدت مثل الخيال=هو عدوي وهو أوفى خليل

كريم يابارق ينوض حدري =واللي سرى بالغداري يقتدي به
واللي ضرب وادي خلاه يجري =محلا بيوت البوادي تبتديبه
يامدمج الساق حالي منك مبري =بري النجاجير عيدان صليبه
ابو قرون تغذى بالشمطري= مثل السفايف عـلى كور النجيبه
ابو عيون ليا دلّت تخزري ترمي= بالاسباب ويل اللي تصيبه
يامن يرد الحبيب وياخذ اجري= قفا بلا سبة ربي حسيبه
البارحه يا حبيبي ضاق صدري =من واجهن به الحشا زود لهيبه
اللي يبينا نبيه والكل يدري =واللي تغلى علينا ويش نبي به

سريت ليل الهوى لين انبلج نوره=أمشي على الجدي وتسامرني القمرا
طعس وغدير وقمر ونجوم منثورة=أنفاس نجد بها جرح الدهر يبرا
يا نجد الاحباب لك حدر القمر صورة=طفلة هلال وبنت أربع عشر بدرا
حبيبتي نجد عيني فيك معذورة=معشوقة القلب فيها للنظر سحرا
فضة شعاع القمر في نجد مسحوره =من شاف لمعة قمر في خدة سمرا

لي ثلاث أيام ما جاني خبر=واااااعنا قلب المولع واااااعناه
كني يوم الناس للعاشق شهر=لا سلام ولا كتاب ولا وصاة
أتصبر يا معين اللي صبر=واتحرى غاية القلب ومناه
في جميع الناس ملكت النظــر=ما نسى حبي وقلبي ما نساه
التمني والتوجد والسهـر=ضرني والقلب جاه اللي كفـاه
هلّ دمعي فوق خدي وانتثر=قلبي المجروح وين ألقى دواه
الهوى ياهل الهوى كله خطــر=خلو هالمشتاق يشبع من هواه
من بحر جدة إلى شرقي قطر=في الحضر والبدو ما نلقى حلاه
شوفة المحبوب والروظ الخضـر=تنعش القلب المشكى وتغـــذاه
مستحيل انساه لو غاب او حضر=ما يحب القلب محبوب ســـــواه