أسمع رسول أشواق قلبي يناديك=ترقص أماني نشوتي لاجل أشوفك
وأخذ من ظروف الرخاء وقت واعطيك =عسى الأماني تبدل شكوك خوفك
تغلى يا سيد الغنادير واغليك =واجيب لك عمر الهنا في كفوفك
يجوز لي يا زين منك تغليك =واعرف وأقدّر يا حبيبي ظروفك
أنا على قربك شفوق وبرجيك =رجوى أملها بالوصال معروفك
يا روح روحي بالغلا كله أعنيك =ياللي تشوق العين حالي وصوفك

جتني وشافتها عيون حايرات =ذا شعاع الشمس او هذا سناها
ضاعوا اللي جوا معاها مسيرات =واقبلت تمشي تقل محد معاها
يا سنا الفضة ويا جيد المهاة =يا شذى نبت الخزامى في وطاها
قلت:زاهي بوجنتك زهر النبات =قالت : إن الرمش يجرح لي صفاها
تجرح الظلمى عيون ناعسات =سلهمت وغضت تغطرس في بهاها
حققوا بالشوف في لون الشفاة =هو خذا منها الشفق ولا عطاها
لو ظلام الليل يعطينا ثبات =فيه من لون الشعر والا كساها
كيف اباصف زين كاملة الصفات؟ =كيف اباصل في حروفي منتهاها ؟

ذكرتني طلعة البدر نور عيوني =يوم شفته هلت العبرة المخفية
من يلوم المغرم المولع المفتوني =لي تذكر شوق ووجنة وردية
ليتهم يا سعود ليروح مروني =مع غروب الشمس بقفاية العصرية
أتمنى والتمني يزيد اغبوني =غيبوه يا خوف ما عندهم ماويه
ليتني في سجتي رحت ما صابوني =من يداوي الجرح والعلة الدخلية
خبروني عنه ضاق الحشا بشجوني =ما قويت الصبر حبه تمكن فيّه

الشوق كل الحكي لو قلت أبحكي لك=سوالف الشوق تلهب قلبـي الظـامــي
اشتاق اشوفـك وتاخذنـي مواصيــلـك=لاكثر من العشق واكثر من مدى ايامي
تغيب تحــضــر مـعــــاليــقي تنادي لك=يامــــتلفي هـات باقي جــرحي الدامي
أهواك تنطق بهـــــــا عين تـراعـي لك=ويصورك مـوقــهـــا بصـحــوي واحـــلامي
أغرب من الشوق في قصةغرامي لك=يتلفني الشـــــوق حــتى وانت قـدامـي

سافر وترجع ياحبيبي على خير=واشوفكم عقب السفر بالسلامة
عسى السفر لك ياعيوني مسافير=يكفي عن التوديع منك ابتسامة
مادامت الفرقا علينا مقادير=معذور لوعضيت كف الندامة
لالا تعذر وش تفيد المعاذير=مسموح مابيني وبينك ملامة
واعرف ترا حبك شغلني عن الغير=حطيت لك وسط الضماير علامة
قلبي على لاماك يكفخ كما الطير=وجفني على طرياك ينكر منامه