ألف أولف وأول السوق نسبه=نسبة تحت ما عاد تحتاج حسبة
سوق ضربنا فوق عشرين ضربة =والصبر زين إلا بسهم المواشي
والباء بدينا واشترينا وبعنا =ويا ليتنا فيما كسبنا قنعنا
طرنا وتعلينا ولكن وقعنا =والصبر زين إلا بسهم المواشي
والتاء توقعنا تزيد المكاسب =وقلنا نبي نشرب لذيذ المشارب
لكن ورطنا بين عارض وطالب =والصبر زين إلا بسهم المواشي
والثاء ثبت عندي بعلم يقيني =إني خسرت وراح ما في يميني
الله على تسديد ديني يعيني =والصبر زين إلا بسهم المواشي
والجيم جمعنا سهوم كثيرة =ولا درينا أن الدعاوي خطيرة
حتى خسرنا والخسارة كبيرة =والصبر زين إلا بسهم المواشي
والحاء حسافة يا جماعة فلوسي =حطيتها بأسهم وكسّرت قوسي
صحيح هالدنيا عطتنا الدروسي =والصبر زين إلا بسهم المواشي
والخاء خلاص أقول توبه ولا أعود =لو كنت بالمكسب موصى وموعود
وهذا قرار ما علي فيه منقود =والصبر زين إلا بسهم المواشي
والدال دجينا بسهم المواشي =نشريه غالي ثم نبيعه بلاشي
هذا جزاه اللي شرا بالخشاشي =والصبر زين إلا بسهم المواشي
والذال ذاك اللي تسبب علينا =ويلاه لو انه يطيح بيدينا
من دون ذبحه كلنا ما رضينا =والصبر زين إلا بسهم المواشي
والراء رمينا رمية دون رامي =وصابت وقلنا حرفنة ياسلامي
السوق طيب لين جانا الصرامي =والصبر زين إلا بسهم المواشي
والزاي زدنا يوم شفنا المرابح =وقمنا مع العالم نزيد المطابح
ويمكن على بعض السهوم انتذابح =والصبر زين إلا بسهم المواشي
والسين سوينا بها فاهميني =نشري نقول السوق بكره يزيني
نبغي المكاسب وأثرنا خاسريني =والصبر زين إلا بسهم المواشي
والشين شاري يومه السوق غالي =ما همني لو زاد فيه أريالي
لا والله إلا راح باقي حلالي =والصبر زين إلا بسهم المواشي
والصاد صدق اللي سهمها منول =حول ميه وسبعين واليوم حول
ينزل إلى ستين شي يهول = والصبر زين إلا بسهم المواشي
والضاد ضاربنا بسهم الفنادق =لكن رمونا مثل رمي البنادق
حتى زبنا بالحفر والخنادق =والصبر زين إلا بسهم المواشي
والطاء طمرنا طمرة دون داعي =نبغي النسب بالباحه أوبالجماعي
واليوم يكفينا حليب المراعي =والصبر زين إلا بسهم المواشي
والظاء ظلمني من نصحني بتعمير =ويقول لي هذا السهم مكسبه غير
وانا مطبح فيه من دون تفكير =والصبر زين إلا بسهم المواشي
والعين عيوا يرفعون المؤشر =يمكن سياسة سوق لازم يخسر
كم واحد من ذا المؤشر مدمر =والصبر زين إلا بسهم المواشي
والغين غيّر يالمحافظ وبدل =موضوعنا حله وبالسوق عدل
نظامكم ما هو كتاب منزل =والصبر زين إلا بسهم المواشي
والفاء فتيحي مشترينه بطمعه =لكن جانا منه عشرين قمعه
ما أظن يستأهل حسابه وجمعه =والصبر زين إلا بسهم المواشي
والقاف قالوا بكره السوق يرتد =والوضع اشوفه كل يوم يتعقد
مقرود يامن طاع شور المقرد =والصبر زين إلا بسهم المواشي
والكاف كافي يا وزير التجارة =خمسين بالميه علينا خساره
إن كان تفهم في فنون الإدارة =والصبر زين إلا بسهم المواشي
واللام لبنى يوم أغارت بلا خيل =خذت بسطوتها سهوم الرجاجيل
وخلت مدامعهم تبل المناديل =والصبر زين إلا بسهم المواشي
والميم ما تنفع سهوم العوايد =خسرانة وما عاد فيها فوايد
الفايدة بالكاش لا صار زايد =والصبر زين إلا بسهم المواشي
والنون نادوا من يعرف السلومي =وقولوا توجه يم شيخ القرومي
يحلها لا صار وقت اللزومي =والصبر زين إلا بسهم المواشي
والهاء هروج كل يوم تعادي =كل يسوي فاهم ٍواقتصادي
ياطيبكم عند العشاء والمنادي =والصبر زين إلا بسهم المواشي
والواو وهقنا المسمى إبراهيم =يقول أنا بقلب جميع المفاهيم
ياعزتي له علقوه الشغاميم =والصبر زين إلا بسهم المواشي
والياء ياربي طالبك ترحم الناس =وان تنتقم يارب من فعل الأنجاس
ولا باس ياللي صابه الهم لا باس =والصبر زين إلا بسهم المواشي