لله در الجرح لله درّه= مدري وش اللي عن هل الحكي مخفيه
من نفسي إللي ما تحب أتكرّه= وإن صابها جرح الزمن ما لتهت فيه
والطيب له وجهٍ حسينٍ وغرّه= والشر وجهه ماحدٍ يلتفت فيه
والرجل لو يبدي على الناس سرّه= يسير سوقٍ ماتجمٌل مشاريه
يهزه اللي مايجيب المسرّه= اللي ليا جاب الخبر ما يوديه
والعلم يُسمع من الرجاجيل مرّه= والحُر نظرات المجامل تكفيه
والنذل لو يبدي عليك المبرّه= لو صافحتك إيده تقفتك أشافيه
والرجل لو نقى شعيره وبرّه= ما صادله حق العشا اللي يعشيه
واللي غدى لعيون الأيام قرّه= ماهو بعيد إمن الغلا والمشاريه
ولدت حر وخطوة الحر حرّه= بعيد عن والي الزمان وجواريه
وقمت أتهجا النجم وأقرا المجره= و أحن لأيام الصبا وأجمل التيه
وإن شفت في تالي زماني مضرّه= الحين أموت ولا يجي يوم ما أبغيه
وأقول لابو هالزمان المعرّه= لاهو مقديني ولا ني مقديه
واللي معه من العقل مثقال ذره= أشوى ولا وقتٍ خذا عقل راعيه
دام الهوى جبار ليه آتشره= ودام الفراق الحل ليه أنجبر فيه
ولا غلاً بحسان كني أطرّه= الله ولا حبٍ يمننك معطيه
أهم شي يصير للقلب كرّه= ملح السوالف ذكرياته بماضيه
الجرح هذا رجل لله درّه= ماهو يخيب هقوة اللي هقى فيه