ليت كل انسان يدري وش نهاية تضحياته=كان مابه صدرٍ يسافر على خطوات آه
ياحبيبٍ كنت أحيا بس لاجل المس حياته=أحضن انفاسه وغيماتي تسولف عن سماه
غصني أهديته لطيره ... وانحرم جفني مباته=أفرح بطلة صباحه وازرع احساسي بمساه
لاشكا لي حزنه الغالي .. أقول: ارجوك هاته=رغم إن الحزن واصل في خفوقي منتهاه
كنت اغار من النجوم اللي تحاصر أمسياته=حتى انا مني أغار ان كنت في لحظه معاه
له قمر عمري وشمس الروح باغلى عشق جاته=قبل مايطلب لقى كل اللي يتمناه جاه
مارحلت الا لمدينة حلمه ولذة جهاته=وان وصلته ظاميه .. رغم العطش أروي هواه
مابغيت الا أكون الواقفه بين امنياته=كنت أولى أو أخيره .. المهم ابقى فـ مناه
ماانتظرت الا يقول ( اهواك ) من همسة شفاته=ويبشر بصرخات قلبٍ مع عيونٍ مع شفاه
كل شعر الحب انا عطّرته بوردة صفاته=كن ناس الكون ماتت عندي ولا احّد سواه !
إيه انا هذي سواتي بس وش كانت سواته=خيّب ظنون الغرام وكل حبي له نساه
ماتوقّـعّـت ان حبه نزوةٍ مثل اغنياته=كان مجروح وجروحي صارت بلحظه دواه
مدري ليه احيا الخيانه والوفا أعلن وفاته=هي قساوه أو وشايه خلّـته يشعل جفاه ؟!
كنت أحسب الحب طاهر بس والله يارداته=دام به ظالم ومظلومٍ بنتعب في الحياه
ليت كل انسان يدري وش نهاية تضحياته=كان يندم .. كان ينزف .. بس مايحتاج آه