يالله يا رب يا معبود يا والي
يا خالق النفس يا عالم حقايقها

الرزق بيديك والمحيا والآجالي
وبيديك الايام مغربها ومشرقها

تكتب لنا فزعتك في يوم الاهوالي
لا حاصر النفس شاهدها وسايقها

واجعل لنا في جنان الخلد منزالي
والنار تعصم عبادك من حرايقها

وآسالك اتدلني جزلات الامثالي
لين آتنقى من الاشعار لايقها

وان عرضّت كلمةٍ ماهيب تنقالي
تردها عن لساني قبل ينطقها

والحاجة الثانية يا قسمنا الغالي
سلام في حفلةٍ رفت بيارقها

سلام لبني عمرو مـ الجال للجالي
يا قمة اعلى الجبال ويا شواهقها

اعتز في لابتي وامدح ولا ابالي
تشهدلي اسيوفها ولّا بنادقها

من قصة الترك ولا فزعة الخالي
يحن رعاّدها ويشب بارقها

وكل القبايل لها تاريخ وافعالي
معروف في حاضر الدنيا وسابقها

ما نجحد الحق ولا نظلم الحالي
ميزان كل الخلايق عند خالقها

وفي قدر سعْد ابن شفيا مزبن الجالي
قطفت من روضةٍ غناً حدايقها

يالنادر الي رقيت المرتقى العالي
وتعانقك قمة المجد وتعانقها

على خطى آبوك ما خيبت الآمالي
جنيت من جملة الامداح فايقها

والنّعم في لول ووالنّعم فـ التالي
حقيقةٍ قبلي التاريخ وثقها

والناس في ذا الزمن مع كثر الاشغالي
صعبٍ تجمّاعها سهلٍ تفرقها

لكنّ في شيمتك يا طيب الفالي
جاتك وفود القبايل من مناطقها

وصلاة ربي عدد ما هل همالي
عليك يشرف عباد الله واصدقها

خالد بن عبدالله بن مشرف العمري


في قاعة اليخت بالرياض
الاثنين 28-3-1436