بالله عليكم يالعيال البواليد
رائعه من روائع الشاعر ابن زويبن،،
عجبتني مره صح لسانه..
.................
بالله عليكم يالعيال البواليد = ياطيبين التربيه والعقيده
امشوا على جيباً يذب الجراهيد =من الجيوب التاليات الجديده
توه يجي من مصنع الغرب توريد=ماسمكروا بديه زيود الحديده
اخير مايركب ومايطوي البيد=طوي البراك اللي طوتها زبيده
امشوا من العارض شمالٍ بتسنيد =وحطو يمانيكم مباني بريده
وشري انسفوه يسار ويمينكم فيد =ومرو على حايل وخلوه سيده
اوموا عليه مع الخطوط السراميد =وكووه لين النار تكوي حديده
ولاترحمونه لين ياقف على عيد= زين النبا راع المزايا الحميده
محرق عراقيب الدلال البغاديد = وعوق الخروف اللي مع امه طريده
وخصوه عني في سلامي تراديد=ردوه من شاني مرارٍ عديده
احلا من الي تو نزل من الغيد =متعلقه من فوق حنوة جريده
لو كان مالي في سلامي مقاصيد =ربع ورفاقه والعلاقه وطيده
قد جيت حسب اسلومنا والتقاليد = وقفت جنبي بالظروف الشديده
بالطيب والنوماس هوماتك بعيد = ومتجود لك في حبالٍ جويده
أنته حفيد مبشرين المفاريد =باللي عليها السبر صل القعيده
واقفوا عليها مبعدين المهاجيد= في ليلةٍ ماهي عليهم سعيده
لحقوا رويثه فوق فج العماريد =يوم ابرمت ذربات الاريا السديده
وتحاولوا قدامهم بالبواريد =يالين ما ابقوا للاعدا شريده
خلو جنايزهم بشقر العباريد = مثل الجنايز بالحروب المبيده
وابوك مال اقصاه بالطيب تحديد=طيبه يقلط بالمجالس حفيده
لعله في جنة الخلد تخليد =يوم الحساب مع النفوس الشهيده
والموت حق ويفعل الرب مايريد = وانا اشهد انه راحله في فقيده
مامات من خلف اليا مات اواليد = وانتم من اصحاب العقول الرشيده
ياعيد كلٍ معجبٍ فيك ويشيد = قدم الملا عسى حياتك مديده
عجبتني باهل الحيل والهرابيد = اللي لهم فيها نوايا بعيده
لو طعتهم ياعيد جابوبك العيد =لكن منته للزواريب صيده
وردتهم ياعيد حزم الجلاميد= انا آشهد انك ياالرويثي وليده
مع درب من رد الثنا للآجاويد = سوق العصي للعوص سقت القصيده
الشاعر عبدالله بن زويبن الحربي
|