خدر العيون وتحتها مبسمٍ غض
ورمشٍ على الأوجان يغريك ظلّه

لما استحى يدمي شفاته من العض
والريق خمرٍ يذهب العقل كلّه

والعنق ضوحه بارقٍ في السماء نض
والجسم دقّه يشتكي ضيم جلّه

اونست قلبي من سبب غيبته جظ
جظ اشقرٍ جول الحباري يتلّه

يوم انتهض لمجلمدات الصخر قض
صُم الحصى يوم اكفخ الريش هلّه

كبدي عليه تقول مرضوضةٍ رض
والراس وجع وداخل الصدر ملَّة

من قابله لحظه شكر طيّب الحظ
ومن شاف وجهه قال ياقدرة الله

قصر الغلا يبنى لمثله وينقض
لي صار ماله في محانيه طلّة

خطاه ياهونه لما قال لي مض
ماشفت مني قلت ماشفت زلّة

يفداه جلفٍ منطقه دايمٍ فض
اللي تعاف الناس جيّة محلّه